Diamars mainta corte a prohibi gobierno di Aruba pa otorga tereno den erfpacht y mester cuminsa tene su mes na e Ruimtelijke Ontwikkelingsplan (ROP) manera a wordo stipula na 2009.
”Nos a haya e veredicto di corte cu tur locual eigenlijk Aruba Birdlife Conservation a buta den e caso contra gobierno di Aruba en cuanto Bubali Plas, tur e punto nan hues a duna nos rason na esey y cu eigenlijk tin hasta un limitacion riba locual gobierno por haci riba Groen Gebied desde awo, no por bay otorga tereno particularmente den parti di hotel, condominio cu e cosnan ey no por bay mas den e manera aki”, Greg Peterson , presidente di fundacion Aruba Birdlife Foundation ta conta Bon Dia.
Sr. Peterson ta agrega cu hues a pone un clausula di boet riba dje tambe di 250.000 florin pa dia pa cualkier infraccion cu por crece bay te na 10 Miyon florin anto Aruba Birdlife Foundation ta hopi contento cu e sentencia aki. ”Mi ta kere cu ta prome biaha naturalesa ta haya un chens aki na Aruba y mi ta spera cu nos por yuda trece un situacion mas balansa pa Aruba”, Sr. Peterson ta bisa Bon Dia.
Sr. Peterson ta bisa cu den pasado a purba diferente cos cuminsando cu conscientisacion, dialogo , a purba via parlamento di unda a haya sosten di tur 21 miembro di parlamento pa protege e area aki pa locual lamentablemente segun Sr. Peterson esaki no a wordo honra. ”Recien despues di e rosamento na Bubali , el a capta nos atencion cu cos ta bayendo for di man y hopi fout, pues nos a lanta un caso pa por trece un stop na esaki anto awe nos a haya e noticia cu porfin hues a para esaki. Tin hopi hende jong cu ta hopi mas consciente di e cuido di nos naturalesa, y e problema cu e tipo di construccion asina ki ta cu e no ta hala; ora bo kita esaki, el a bay pa semper, esey kemen cu e siguiente generacion lo nunca lo haya e naturalesa cu eigenlijk nan mester haya, y banda di esaki, nos ta un organisacion cu ta protege parha nan aki na Aruba cu ta wordo hopi menosprecia y no ta wordo reconoci, esaki ta un señal tambe cu nos ta un instancia cu por lucha pa naturalesa di Aruba y en particular pa e parha nan di nos isla”
Sr. Peterson ta splica Bon Dia cu tin algun stap mas planea, ta bay test algun caso mas pa locual no kier a divulga demasiado informacion ainda. ”Nos ta bayendo por lo menos dos otro caminda tambe unda cierto cosnan a wordo haci cu ta eigenlijk totalmente inaceptabel. Nos ta bay reta e idea cu por bay ki ora cu ta den lama of cualkier area di naturalesa y rosa sin cu e bay na un manera eticamente aceptabel”, Sr. Peterson ta bisa.
E abogadonan cu a representa gobierno den e caso aki ta prefera di keda sin duna comentario.
