ORANJESTAD – Diabierna pasa e comunidad di Aruba a haya sa di e construccion di un hotel nobo na Aruba den area di Baby Beach. Aruba Birdlife Conservation y algun otro organisacion a ricibi un estudio di “Impacto Ambiental di Baby Beach Hotel”, riba cual e organisacionnan a reacciona expresando cu nan no a haci un debido proceso den cual comunidad y organisacionnan tabatin participacion, tanto di parti di gobierno como companianan involucra y nan a expresa nan rechaso pa e proyecto aki.

Bon Dia Aruba a tuma contacto cu señor Greg Peterson di organisacion Aruba Birdlife Conservation pa puntra su opinion riba e topico aki. El a splica cu “ningun hotel mas ta bon pa Aruba”, Aruba no ta sostenibel mas, ainda tin cierto cosnan cu ta pasa, cu no por mas, manera Peterson a expresa. “Tin un cantidad di proyecto cu nan a bisa cu nan no por a draai bek, pero nan no ta laga nos sa ki proyecto ta bin, no tin transparencia den henter e proceso.”

Asina tambe el a bisa cu gobierno tampoco a splica ki impacto esaki tin pa Aruba, tin modelonan cu ta existi, cu ta laga nos sa cuanto trahado stranhero mester bin Aruba, pa motibo cu e pais no tin trahado;. “Hopi Arubiano no ta gusta e trabaonan aki tampoco.”

Riba esey tambe tin cu “all-inclusive” cu tambe ta un modelo cu no tinun ‘spinoff’ positivo pa economia di e pais. “Esaki ta algo cu absolutamente Aruba no mester.”

Esaki lo por trece un impacto di 20.000 of 25.000 hende cu lo bay bin Aruba pa biba aki, unda e pais ta sigui yena, e pais tin casi 180 kilometer cuadra cu mas di 110 .000 habitante; di casi 200 pais, Aruba ta den e top 15 caba di mas polacion pa kilometer cuadra. Bo por mira esey den trafico, esey ta algo cu yen di consecuencia, Greg Peterson ta bisa.

Aruba ta importando pobresa caba, den e sentido cu pa un persona por contribui na e pais, e trabao mester duna un entrada averahe o mas halto, si e ta mas abao ta e resto di pueblo mester subsidia esaki, por ehempel Azv, educacion, etc. “Nos tur tin cu paga, pa trece e hendenan aki, no e hotel, e doño cu ta trece e hotel ta haya e ganashi pero e pueblo tin cu paga p’e y esey ta causa pobresa.”

Peterson: “Esaki no ta bon pa economia, e ta causando poco poco mas pobresa riba e isla y esey lo trece un problema grandi.”

Pa loke ta e pregunta si e proyecto ta cuadra cu ROP, el a manifesta cu tur e ONGnan ta studiando e diferente aspectonan y nan tin te 15 di maart pa nan entrega un contesta o apelacion formal na gobierno y nan tambe (ABC) ta analisando.

E cantidad di luganan unda hende por biba ta birando menos y menos, e terenonan cu e muchanan lo bay haya den futuro no ta nada di gaba, lo cual nos a haya como e generacion prome, awo nan lo mester biba cu dos of tres cas contra otro, pero den nos cultura nos no ta custumbra di biba asina,” Peterson a comenta.

Ta bon pa comunidad di Aruba realisa, cu “menos y menos lo resta pa nan yiunan si nos sigui e caminda aki”, un par di hende so ta beneficia di e proyecto aki y e tin su impacto riba tur e resto, Aruba tin un situacion di “Overtourism”; ya caba e isla tin di mas turista pa un isla chikito asina y esey tin su impacto, “nos tin yen di actividad, muy en particular por ehempel e ‘offroad’ cu ta destruyendo henter nos isla, y solamente mas lo bay bin pa destrui tur cos pa un par di hende yena nan saco,” el a agrega.