Cu un poco mas cu 1 aña laat pa wordo entrega, e proyecto ‘Green Corridor’ ta programa pa wordo entrega den luna di augustus, aunke un fecha exacto no tin ainda.

Durante un entrevista cu minister encarga cu infrastructura, Otmar Oduber (POR), e ta splica Bon Dia Aruba cu ainda tin basta punto cu e contratista mester cumpli cu ne prome cu e fecha di entregamento.

Algun luna atras, na inicio di gobernacion tabata tin algun discusion entre e contratista y gobierno di Aruba. E motibo tabata cu segun e minister ta splica, ‘tabata tin mas cu 500 punto cu e contratista tabata den incumplimento cu ne’. Ainda tin mas o menos 75 punto cu e contratista mester atende cu ne y e minister ta calcula cu mas o menos mita di esaki, no lo por bay cumpli cu esaki, pero e lo wordo poni na altura cu ta trahando pa cumpli cu mas punto posibel.

E situacion ta haci cu no por yega na un fecha exacto di entrega y mientras no tin fecha di entrega, pais Aruba no tin obligacion pa paga.

Incumplimento
No obstante cu pa e motibo di e incumplimentonan cu tin pais Aruba por haci un ‘claim’ y pone e contratista den default, e mandatario ta splica cu ta laga e espacio pa e contratista por cumpli.

Sr. Oduber ta aclaria na Bon Dia cu tanten tin incumplimento, gobierno no mester paga e suma completo cu ta poni pa paga cada kwartaal. “Obviamente pais Aruba no por bay paga pa algo cu e no a haya”, e minister a bisa. E parti aki por wordo considera manera un forma di boet pa no cumpli y e ta keda asina te ora e contratista por cumpli atrobe. Di e puntonan cu e minister ta premira cu e contratista no lo por cumpli nunca mas cune, ta calcula cu esaki lo trece cu ne 200 mil florin di boet.

Pa loke ta e prome pago cu mester tuma luga na december venidero pa e proyecto PPP aki, ya caba tin un boet di mey miyon florin. E mey miyon aki ta poni vast como cu e proyecto no a wordo entrega na augustus 2017 manera contract ta bisa. Pues na tur, ta papia di alrededor di 700 mil florin cu ta wordo premira cu no lo mester paga na e prome pago.

Supervision
Pa loke ta trata e supervision di proyecto, esaki awo ta bayendo bek manera debe ser, segun e minister. Anteriormente esaki no por a bay debidamente ya cu DOW no tabata tin e capacidad di hende pa handle dos proyecto grandi alabes (Green Corridor y Watty Vos Boulevard).

“Mi ta lamenta cu e minister anterior no a duna oido na DOW ora cu nan a bati bel riba esaki”, e mandatario ta bisa. E ta splica cu a pone 350 mil florin disponibel pa DOW por tin suficiente capacidad pa controla debidamente. DOW lo mester keda monitorea tur desaroyo di e proyecto y keda pone gobierno na altura di imcumplimentonan.

Parti memey di caretera
A puntra e mandatario riba e parti memey di caretera (strook), cu tin actualmente ya cu ta wordo comenta hopi den pueblo cu esaki lo tin un mahos bista y cu te hasta por forma un otro peliger pa automobilistanan.

Segun e mandatario, te na e momento aki DOW no a constata cu e strook traha di santo ta forma un peliger directo pa e caretera. E ta bisa si cu cada biaha cu por ehempel awa yobe y santo plama riba e caminda, DOW por hala atencion di e contratista riba esaki y pidi pa e wordo drecha.

E ta sigui splica cu pa e parti aki, ‘e contracto ta duna e espacio pa e contratista uza e forma aki pa separa e dos camindanan’. A puntra e mandatario si esaki no ta parce di ta impractico, riba cual e mandatario ta bisa cu ‘esey ta e decision cu e contratista a tuma; pues pa 18 aña largo nan lo mester keda mantene e strook aki’.

Segun informacion cu Bon Dia Aruba a logra compila, ta parce cu ya caba e contratista mester a inverti 10 miyon dollar adicional pa mehora cosnan cu no a ser haci bon for di cuminsamento. Redaccion di Bon Dia lo ta tumando contacto cu e contratista pa mas informacion.