Vocifera intencion ta algo otro cu mustra logro!
E siman aki Aruba lo conoce e di seis edicion di e conferencia ‘Green Aruba’. Por cierto un proyecto cu a start cu hopi briyo, mustrando e entusiasmo y intencion positivo di e momento ey. Awor, na 2015 mester yega na conclusion cu e entusiasmo a bira menos, igual e fondonan pa sustenta un programa adecua, y realmente un ambiente di incertidumbre kico lo por bay logra ainda den e proximo par di aña.
E situacion berdadero actual ta bira obvio masha rapido mes. Mester bisa cu den esey nos no mester bay leu pa haya e cifranan al caso. Den e introduccion riba e website di e conferencia nos por lesa cu na 2015 nos ta acercando 20% di energia renovabel; esey a base di principalmente e parke na Vader Piet cu tabata t’ey caba na 2009. “Cu e proyectonan cu ta continua y cu ta bin aden cu ta operacional na fin di 2017, lo surpasa e barera di 40% na 2018!”. Banda di cierto aprecio pa e frankesa demostra aki, e pregunta ta keda con logra 100% energia renovabel pa 2020? Esunnan cu a adverti pa e optimismo exagera durante e añanan cu a transcuri, a haya rason pero no ta agradabel pa haya rason di e manera aki. Nan critica sigur no tabata basa riba e afan di ta profeta di mal noticia, sino riba conocemento di e problemanan cu ta presenta, specialmente den e situacion di ‘stand alone’ di un isla chikito.
Otro punto positivo di e introduccion di e conferencia ta cu por fin ta cuminsa admiti cu e plan strategico aki no ta cos cu ta bay logra asina facil, mirando e multiple retonan cu ta presenta. Ta aparece e cuadro yama ‘RAS’ cual ta representa ‘Reliable, Affordable, Sustainable’. Den un entrevista bastante extenso cu corant Amigoe e organisado di e conferencia, director di Utilities Aruba Frank Hoevertsz, ta referi na e problema di aplicacion di tecnologia pagabel y confiabel den almacena electricidad. Segun su opinion, Aruba ta demasiado chikito pa sirbi como plataforma pa haci experimento, cu e stabilidad di e red di distribucion den wega. Y esaki ta exactamente un di e problemanan grandi cu tin cu e di dos parke di molina, cu e aumento drastico di energia di biento cu e lo ocasiona, cual lo bira mas cu loke ta manehabel pa e red di distribucion.
Ta pesey cu semper expertonan den mayoria ta recomenda busca un mescla di diferente tecnologia pa yega na produccion complementario, na e momento propicio cu mester di esaki. Bay den casi 40% di bo produccion diario di biento, sin por conta cu sistema comproba di almacenamiento, ta un riesgo demasiado grandi, esey ta e argumento mas contundente contra e construccion di e di dos parke di molina na Urirama, banda di tur otro critica y obhecion di indole di salud, medio ambiente, religion, etc.
Ta di aprecia cu, aunke hopi laat den e proceso, por fin e lidernan den maneho di e proyecto strategico aki a bin reconoce cu mester busca mas aleu pa por yega na loke den e terminologia adopta nan ta yama ARIS: Aruba Renewable Integration Study. E intencion di esaki ta pa diseña e caminda pa bay pa logra integra energia renovabel, manteniendo siguridad di e red di distribucion y minimalisando costo di e sistema en general. Tambe tin plan pa cuminsa amplia y profundisa e dialogo y compartimento di conocemento y experiencia cu otro teritorio den nos region, algo cu semper ta bonbini.
Tur esaki ta indica cu a bin cierto realismo, cu añanan atras a ser vocifera caba, pero e tempo aya e criticonan aki a ser considera contrincante politico cu ta contra e vision di Prome Ministro Eman pa yega na 100% energia renovabel na 2020. Aunke ainda a mantene e lema ey, cu e plan pa yega na 40% renovabel na 2018, y reconociendo cu e di dos 50% ta esun mas dificil, ta bisto cu sin bisa esey cu tanto palabra, ta reconoce cu yega na 100% no lo ta na 2020. Ademas cu diferente comentario, tanto di banda di Richard Branson y di Fondo Monetario Internacional, a mustra riba e imposibilidad di yega na 100% berdadero, pasobra den e posicion di ‘stand alone’ bo ‘back up’ semper ta basa riba combustibel fossiel (fuel oil o gas).
Nos lo a gana algo caba si por a haci e switch di fuel oil pa gas, pero aki e futuro di e compania cu ta distribui fuel oil na Aruba (Valero) ta hunga un papel. Gobierno ta contemplando keda cu e compania aki den su negociacion cu Valero, loke por bay dificulta e cambio pa importacion di gas pa WEB, pa cual no mester di warda riba LNG, ni riba gas di Aruba mes, cual ultimo aki no ta sigur tampoco. Concluyendo por bisa cu a keda hopi ainda pa haci, mucho mas cu lo a spera na 2010 tempo cu a tene e prome conferencia.
