(AP)—E parlamento Griego a aproba diamars un legislacion nobo cu lo duna miles di migrante indocumenta residencia y permiso pa traha entre e deficit di labor. E ley crea pa e gobierno centro derechista ta conecta e derecho di residencia cu prueba di empleo. Segun e ministerio di labor, esaki lo afecta 30,000 hende, hopi di nan trahadonan agricultural.
E agencia di migracion y refugiado di Nacionnan Uni a aplaudi e ley nobo, cual ta aplica pa migrantenan cu ta bibando na Grecia sin permiso di residencia pa al menos tres aña te cu fin di november. Esaki no ta cubri yegadanan mas despues. Legisladonan den e parlamento di 300 miembro a vota 262 en fabor di e ley—e pesar di critica for di e partido gobernante New Democracy cu e apoyo di partidonan iskierdista den oposicion.
New Demoracy a menasa pa expulsa cualkier cu no ta apoya e medida—haciendo un excepcion pa un ex-prome minister cu a critica e legislacion. Papiando despues di e voto, minister di migracion Dimitris Kairidis a aplaudi e consenso den parlamento, bisando cu esaki lo yuda adresa e demanda di mercado pa trahadonan cu menos talento. El a bisa cu gobierno ta busca pa mescla “control di frontera estricto y lucha traficacion di migrante por medio di facilita migracion legal” segun e necesidadnan di Grecia.
El a bisa cu e ley nobo no lo permiti ganashi ilegal di ciudadania Griego of derechonan di reunificacion cu famia, y e permisonan lo ser contingente riba e empleo continuo di e migrantenan. Den un declaracion conhunto, e organisacion internacional pa migracion y UNHCR a describi e legislacion como “un ehempel positivo di dispuesto politico pa kita e limitacionnan cu ta haci hende invisibel y marginalisa.”
E declaracion a bisa cu e lo beneficia e economia di Grecia mientras ta proteha migrante for di explotacion por medio di legalisa nan empleo. E dos agencia tambe a aplaudi e provision cu ta reduci e espera for di seis luna pa dos luna pa buscadonan di asilo cu kier drenta e mercado laboral Griego.
Localisa den e skina zuid-oost di Union Europeo riba e Lama Mediteraneo, Grecia ta keda un punto di entrada importante pa hendenan buscando un miho bida dentro di UE. Mayoria ta crusa den boto chikito for di Turkia pa e islanan Egeo di Grecia.
A pesar di e caida den yegada for di e peak di casi 1 miyon na 2015, 45,000 hende a yega Grecia e aña aki, e cantidad mas halto den cuatro aña. Mientras cu hopi ta haya residencia legal como refugiado, otronan ta keda mayormente ilegal den e pais pa varios aña.
