Great Barrier Reef – un zona grandi di coral na Australia – ta enfrentando un periodo critico di stress di calor durante proximo simannan despues di e evento mas amplio di ‘coral bleaching’ cu e maraviya natural a yega di experimenta, cientificonan a bisa ayera.
David Wachenfeld, hefe cientifico na Great Barrier Reef Marine Park Authority, e agencia gubernamental cu ta maneha e expansion di coral den costa nort oriente Australiano, a bisa cu temperatura di ocean durante proximo luna lo ta crucial pa e forma con e reef ta recupera di bleaching causa pa calor. “E pronosticonan ta indica cu nos por spera nivel andando di stress termal pa sikiera e proximo dos y tal bes tres of cuatro siman”, Wachenfeld a bisa. “E proximo dos pa cuatro siman lo determina e resultado final.”
Temperatura di ocean a traves di mayoria di e reef tabata 0.5 te cu 1.5 grado Celsius riba e averahe di maart. Den parti di e parke marino den sur, cerca di e costa cu a evita e daño di bleaching anterior, temperatura di ocean tabata 2 pa 3 grado Celsius riba e averahe.
E autoridad a ricibi 250 reporte di coral cu a bleach pa motibo di temperatura eleva di lama durante un februari inusualmente cayente.
Ove Hoegh-Guldberg, un cientifico di Australian Research Council Center for Excellence in Coral Reef Studies, a bisa cuanto di e coral lo recupera y cuanto lo muri no lo ta conoci pa varios siman. El a agrega cu ta hopi preocupa pa e situacion mirando e pronostico.
Great Barrier Reef Marine Park Authority aña pasa a reduci su pronostico pa e condicion di e coral for di ‘malo’ pa ‘hopi malo’ pa motibo di keintamento di ocean. Den su ultimo reporte, cu ta actualisa cada cinco aña, a haya cu e menasa mas grandi na e reef ta keda cambio climatico. E otro menasanan ta asocia cu desaroyo di costa, awa cu ta bin di tera, y actividad humano manera piscamento ilegal.
