Grandesa di nos pueblo ta su gran cordialidad

Awe ta celebra Dia di Turismo, un dia hopi importante pa Aruba cu ta depende casi exclusivamente riba e sector aki pa su economia. Mientras cu un parti di Aruba su industria di turismo ta depende riba naturalesa y infrastructura di nos isla, e ta depende tambe riba e idiosincrasia di nos pueblo.

Na februari, ora rey Willem Alexander a bishita nos isla, gobierno a urgi den su invitacion pa pueblo “mustra [famia real] e cordialidad cu nos tur conoce na Aruba y duna nan un caluroso bon bini.” No ta por nada hasta den nos himno nacional ta menciona cu e “grandesa” di nos pueblo ta “su gran cordialidad.” E ta algo cu a defini Arubiano como hende, como pueblo. Un caracteristica cu cual nos ta identifica nos mes, y cu paso di tempo, otro hendenan tambe ta identifica nos cune.

Cordialidad ta defini como “comportamento cu ta amigable, pero tambe formal y educa.” Segun “Cordialidad – que es, ejemplos, definicion y concepto” di J. Perez Porto, etimologia di e palabra, cu ta bin di Latin, ta duna nos un indicacion di e caracteristicanan tras di cordialidad. E ta bin di e sustantivo “cor, cordis” cu ta nifica “curason”; -al cu ta nifica “relativo na”; y -dad, cu ta usa pa indica un cualidad. Kiermen, un cualidad relativo na e curason. Gentilesa, respet y cortesia ta vincula na cordialidad. E idea di cordialidad ta usa referiendo na e trato civilisa, mustrando bon educacion.

E cordialidad aki ta un di e aspectonan cu ta haci nos isla asina atractivo pa turista. Cualkier blog, website of articulo tocante bishita na Aruba casi sin fayo ta inclui un mencion di e amabilidad y cordialidad di nos pueblo. Esaki, combina cu e seguridad relativo di nos isla, ta duna nos un bentaha compara cu otro destinacionnan den e region. Pero tambe ta pone riba nos e peso di expectativanan.
Es decir, nos bishitantenan ta yega Aruba sperando cu nan ta bay ricibi un trato cordial, amable, amigable. Cu ta bay yuda nan cu pasenshi, cu un sonrisa. Segun e website TheTravel.com, “na Aruba, biaheronan ta bay wordo ricibi y brasa pa hende lief y amigable. Pues bishitantenan por anticipa un saludo agradable di cada miembro di poblacion Arubano. E hende di Aruba ta atrae biaheronan pasobra nan ta carga e sintimento natural di hospitalidad graba den e cultura local. Pa motibo di nan naturalesa gentil y generoso, bishitantenan no ta bay tin miedo di pidi pa direccion, ayudo of conseho, ya cu nan sa cu pueblo di Aruba ta bay asisti y guia nan cu gusto.”

Lamentablemente, cu paso di tempo por nota cu e balor aki cu ta haci Aruba asina unico y atractivo poco poco ta bay perdi. Awendia, tin bishitantenan ta lamenta cu nan a ricibi un trato friu, sin respet, sin cordialidad. Esaki por tin varios causa, entre otro, cambio di actitudnan cultural, falta di trapaso di balornan di un generacion pa otro, of falta di asimilacion na nos cultura tradicional.
Ademas di afecta nos industria turistico, e perdida di cordialidad como un balor crucial den nos cultura tambe por tin consecuencianan negativo pa nos propio identidad como pueblo. Igualmente, e falta di cordialidad entre nos mesun hendenan por conduci na un desintegracion di e tela social cu ta asina esencial pa un pais sobrepobla manera Aruba por funciona civilisadamente.

E cordialidad aki mester por extende na tur area di nos sociedad. Por ehemplo na trabao, hasta pa esnan cu no ta den industria turistico, ya cu cordialidad ta haci relacionnan interpersonal mas ameno y mas facil pa maneha. Kico ta encera pa ta cordial?

Segun e website di conseho laboral, performancejourneys.com, algun manera pa practica cordialidad ta cuminda hende, usa palabranan manera por fabor y danki, mustra aprecio. Habri porta pa otro y laga nan drenta prome. Reconoce e presencia di un persona cu a caba di yega. Referi na hende usando nan nomber y evita usa terminonan demasiado casual. Ta respetuoso di otronan, no usa lenguahe derogatorio of inflamatorio, y evita sarcasmo.

Specialmente pa esnan cu ta trata den nos sector turistico, cordialidad ta inclui duna atencion, tempo y pasenshi na nos bishitantenan. Atende nan cu amabilidad y respet, y semper tene cuenta cu maske nan por ta “haci fastioso,” mester mantene un actitud formal y respetuoso cu tur bishitante.

“Algun persona no gusta ta cordial pasobra ta sinti manera bo ta siendo falso – specialmente cu hende cu bo no gusta,” segun performance journeys. “En berdad, bo no ta poniendo un fachada si bo ta cordial cu un hende cu bo no gusta. E ta nifica cu bo ta mas profesional y menos inmaduro. Considera con bo ta sinti ora otronan a trata bo cordialmente. Considera con bo mes ta sinti ora bo trata otronan cordialmente. Considera e fortaleza y disciplina cu bo ta sinti ora bo ta cordial hasta ora otronan no ta. Ser cordial ta laga bo disfruta bida mas.”

Riba e Dia di Turismo aki, nos ta invita nos pueblo pa reflexiona riba nos identidad como Arubano, kico e ta nifica pa ta cordial, y con nos idiosincrasia tin impacto riba e realidad y futuro social y economico di nos pais.

Ralph Waldo Emerson a skirbi: “E musica cu por yega mas profundo y sana tur malesa ta discurso cordial.”