Te awor nos no por a mira interes mayor pa e ronda di indexering cu gobierno a dicidi pa su empleadonan y otro asalariado cu ta riba payroll di gobierno. Manera indica anteriormente den e medio aki, e 11,7% di aumento di salario lo tin consecuencia grandi pa e suma total cu gobierno lo bay paga den e proximo añanan na gasto di personal.

Esey ta tambe di interes pa e discusion tocante e norma nobo pa gasto d personal, cual ta 10% di nos Producto Interno Bruto (PIB, GDP) di un determinado aña, pa e total di gasto di personal di gobernacion den sentido amplio, no solamente gasto di e ministerionan, riba cual e norma di e supervision financiero te awor tabata basa. Tocante esey mas despues pero antes algun cifra basico.

Aumento di 11,7% pa ken?

E aumento di en total 11,7% a keda separa den dos parti di cual un parti (6%) ta ser duna durante loke a keda di e aña aki, mientras cu na 2025 ta añadi e porcentahe restante. Segun declaracion di gobierno mes, refiriendo na e suma envolvi cu pago di aumento na e empleadonan di e fundacionnan subsidia pa gobierno, esaki pa 2025 ta encera un suma di Afl. 20.600.000 pa 1.000 empleado. Tumando esaki como punto di salida, cuanto e totalidad di e operacion financiero ta bay costa? Esey ta depende di con grandi e payroll actual di gobierno ta. Nos no ta dispone ainda di presupuesto 2025, pero como referencia algun cifra reciente. Den e ultimo reportahe financiero di 2023, entrega na mei 2024, gobierno tabatin na e ministerionan emplea 3.416 persona. Hunto cu e personal di enseñanza (publico) y Kustwacht esaki ta duna un total di 4.241 persona emplea cu ta ricibi e aumento.

Pero esey no ta tur, pasobra tin mas grupo cu ta riba payroll di Pais Aruba, manera e entidadnan institui via Constitucion: Parlamento, Algemene Rekenkamer y Raad van Advies. Nos no tin cifra actualiza di nan payroll, pero e analisis di IMF, haci na 2019 pa gobierno di Aruba, ta menciona un total di 245 persona, cu tabata ricibi Afl. 21 miyon na salario. Ta trata anto en todo caso di un grupo di 4.500 persona cu ta haya e aumento completo aki na 2025. E suma envolvi den esaki lo ta anto 4,5x 20.600.000 = Afl. 92.700.000, casi 93 miyon? Hunto cu e suma pa e fundacionnan ta trata anto di un suma adicional di Afl. 113.300.000 pa aña 2025? Esaki ta trece cierto duda cerca nos. Manera nos a publica anteriormente, gobierno tin un payroll total di alrededor di Afl. 700 miyon. Nos por mira cu na 2019 ya gobierno tabatin Afl. 677 miyon na gasto di personal. En berdad cantidad di personal a mengua, pero di otro banda tabatin aumento di gasto. E propio sector di fundacion subsidia den e analisis di IMF menciona tabata encera 858 persona y awor gobierno mes ta papia di 1.000 persona. Na 2019, 858 persona tabata costa Afl. 72 miyon; mil persona lo ta costa riba e promedio di e tempo ey (83.900 florin), en total Afl. 83,9 miyon. E eror aparentemente ta den atribui e Afl. 20,6 miyon na e fundacionnan cu ta solamente un parti di e categorianan subsidia, cu en total na 2023 a costa algo mas di Afl. 223 miyon, di cual un gran parti ta subsidio di salario. E suma di Afl. 20,6 miyon lo ta coresponde na henter e sector subsidia.

Di tur manera, e grupo di asalariado paga pa Pais Aruba ta encera cerca di 2.300 persona den sector subsidia, incluyendo enseñanza no publico subsidia, y e grupo di empleado publico di por lo menos 4.500 persona. Por observa cu den e proyeccion multi-anual cu CAft ta presenta den nan conseho riba presupuesto 2025, entre 2023 y 2025 gasto di personal ta aumenta cu Afl. 51 miyon y gasto di subsidio cu Afl. 27 miyon, en total Afl. 78 miyon. Un parti grandi di esaki por atribui na e aumento salarial.

Gobierno tin e fondonan pero no e corecto

Si e pregunta ta si gobierno tin e fondonan pa un operacion di e magnitud aki, e contesta lo ta afirmativo. Pa 2023 y 2024 e medidanan di impuesto, hunto cu e recuperacion economico despues di e crisis di 2020, a percura pa un aumento sin precedente di entrada pa Pais Aruba. Reporte preliminar di 2023 ta duna un suma di algo mas di Afl. 200 miyon pa ‘gewone dienst’ di gobierno. Sin embargo, uso di esaki ta mara na cierto condicion segun e acuerdonan cu Hulanda den cuadro di supervision financiero. E criterionan aki ta defini cu e promer 1% di surplus di e ‘sector colectivo’ ta destina completamente na pago di debe di Pais Aruba. E demas suma disponible di surplus por ser usa 50%/50% pa paga debe y haci inversion. Gobierno a haya notificacion caba di e organismo supervisor CAft cu no por usa placa di e surplus pa aumenta salario, pero cu por haci esaki via traspaso di placa destina na e gastonan structuralmente menos di ‘bienes & servicio’. Esey no ta parce di ta duna tanto perspectiva; e mesun reportahe di cuartal 4-2023 menciona anteriormente ta duna un suma di alrededor di Afl. 15 miyon menos gasta na 2023 pa e categoria aki. Ni varios aña presupuestario hunto, pa e gastonan di bienes & servicio austeriza, no ta yega na e suma cu gobierno kier dedica na e aumento di gasto di personal cu ta ripiti cada aña venidero.

Mester tuma na cuenta cu mas gasto di personal ta resulta tambe di e aumento automatico di payroll cu ta bin di e asina yama ‘periodiek’ den e schaalnan aplica, cu no ta mara na evaluacion di prestacion individual. Sin mas personal na trabao, anualmente gasto di personal semper ta sigui crece. Hunto cu e aumento grandi aki di salario, e consecuencianan pa presupuesto ta mustra di mester bin di e surplus cu mester bay pa paga debe y inversion, y paga mas salario no ta inversion.