E reunion publico den Parlamento diahuebs mainta na unda cu Gobierno di Aruba a duna un update riba negociacionnan cu ta tumando luga cu Hulanda, a conclui cu mayoria Parlamentario a aproba e mocionnan pa pidi Gabinete Wever-Croes pa sigui na mesa cu Hulanda pa negocia.
Prome Minister Evelyn Wever-Croes a elabora ampliamente riba e trayectonan di negociacionnan cu Hulanda desde cu dia 22 di augustus ultimo, Parlamento a duna indicacion con nan lo kier pa Gobierno sigui negocia cu Hulanda .
Den oranan di anochi, votacion a tuma luga riba e mocionnan cu a wordo presenta durante e reunion publico. Oposicion a presenta un mocion pa urgi Gobierno di Aruba firma Raft prome cu 1 di october 2023. E mocion aki a conta cu solamente 5 voto di sosten di Parlamentarionan Miguel Mansur, Gerlien Croes, Ryçond do Nascimento, Aquanette Gunn y Marisol Lopez-Tromp. Fraccionnan di MEP, RAIZ y AVP a vota contra e mocion. Apenas 5 voto na fabor y 16 en contra, y cu esaki RAft ta pasa pa pasado. Mocionnan pa pidi Gobierno sigui negocia cu Hulanda, a wordo aproba.
Durante e reunion den Parlamento, Prome Minister a anuncia cu Gobierno di Aruba a haci un proposicion na Hulanda pa yega na un acuerdo riba liñanan grandi. Den e acuerdo aki, Gobierno a propone pa traha cu un solucion hibrido, un Rijkswet, Ley di Reino, cu ta regla algun aspecto y un Landsverordening, un ley local, cu ta regla algun aspecto. Hulanda a indica di ta dispuesto pa sigui papia riba e tema di solucion hibrido. Negociacionnan di ambos gobierno lo sigui pa propone kico ta bay den un Ley di Reino y kico ta bay den un Ley Local.
“Gabinete Wever-Croes lo sigui traha y negocia cu Hulanda pa yega na e miho solucion pa nos pueblo. Mi ta gradici e Parlamentarionan cu a duna sosten na e mocion pa Gobierno sigui negocia cu Hulanda pa yega na e miho areglo den beneficio pa henter pueblo di Aruba”, Prome Minister Evelyn Wever-Croes a duna di conoce.
