E interes di comunidad di Aruba pa yuda e pashentnan di dialyse cu a bini for di st. Maarten tabata visibelmente hopi grandi. Varios hende a activa mesora manera cu a scucha e noticia anto a acudi na Imsan y st. Theresita Center na San Nicolas pa laga nan donacion. Ainda ta acepta donacionnan awe na st. Theresita Center entre 9’or pa 12’or di merdia.
For di serbete, pasta di djente, sapatonan, paña te hasta productonan comestibel por a mira na st. Theresita cu varios hende a trece pa yuda e pashentnan biniendo for di st. Maarten. Na prome instante a surgi un broadcast di WhatsApp unda cu a wordo pidi pa comunidad bin trece nan donacion/material na Imsan. Pero manera nos a compronde for di trahado di siguridad na Imsan,demasiado hende a cuminsa bin pues a opta pa move e luga di donacion na st. Theresita Center pa no stroba yegada di e pashentnan. Sra. Daisy Tchong tabata presente como boluntario na st. Theresita Center ayera nochi. “Mirando kico a pasa na nos isla ruman , pakico nos no por duna un man,” el a bisa. Janine Rodriguez di Slachtofferhulp, kende tin 17 aña ta haci e tipo di trabao aki, tambe tabata presente guiando henter e proceso. A concentra na pidi hende pa trece pañanan pa ta den hospital manera pidjama y carson cual ta cosnan necesario mas principal. “Pampers, paña di mucha y hende grandi, kico cu ta tur cos ta bon”, sra. Rodriguez a bisa Bon Dia. Si den caso un persona kier yuda financieramente, esaki ainda lo ta posibel via di Cruz Cora.
