Lidernan di Union Europeo di varios pais a duna e peticion di Gran Bretaña pa renegocia e acuerdo encuanto Brexit, prepara den un proceso den un aña y mey di tempo, un coro conhunto di “No, non, nein,” ora premier Theresa May a propone cambio den e acuerdo pa e por convence su miembronan di parlamento pa vota na fabor di e acuerdo.
Na Londres, May mes mester a admiti cu e no sa exactamente con su parlamentarionan lo kier cambia e acuerdo pa atende principalmente e problema di e frontera na Irlanda, cu ta surgi na momento di un salida di Gran Bretaña di Union Europeo sin un acuerdo. Tur esaki sucediendo mientras e pais ta rumbo pa un salida na menos di dos luna, unda e fecha fiha pa salida ta 29 di maart venidero.
“Simplemente, caminda ta cabando cu nos,” ministro di asunto exterior di Irlanda, Simon Coveney a bisa. Contento cu su votacion gana den parlamento, May ta trata di yega na “cambionan legalmente imperativo” pa e acuerdo di separacion. Parlamento Britanico a vota na fabor pa manda May atrobe pa Bruselas pa negocia cu UE “areglonan alternativo” ignorando e advertencianan di UE cu no por cambia e acuerdo cu a cera cu May algun luna pasa. “Lo no renegocia e acuerdo di salida,” Jean-Claude Juncker, hefe di e brasa ehecutivo di UE, e Comision Europeo, a bisa. Juncker a bisa parlamentarionan Europeo na Bruselas tambe cu e “cauerdo ta e miho y unico areglo posible.”
Prome Ministro Leo Varadkar di Irlanda a bisa cu “nos a subi e caminda ey un biaha cabay mi no ta kere cu e areglonan alternativo ey ta existi.”
E oposicion Britanico ta centra riba e areglo pa e frontera cu ta surgi entre Irlanda y e teritorio Britanico
di Irlanda di Norte (Ulster) cu durante membresia di Gran Bretaña di UE tabatin un frontera habri. E acuerdo ta propone un union duanero cu ta tene Reino Uni pa varios aña ainda dentro di reglanan di Union Europeo.
