Funcionarionan di gobierno Britanico a reactiva plannan di emergencia di tempo di guera friu pa realoca famia real den caso di disturbionan serio na Londres, si e pais hay’e confronta cu un salida repentino y violento di Union Europeo, dos corant di diadomingo na Londres a publica.
“A plannan di evacuacion di emergencia ta existi di tempo di guera friu pero awor nan a surgi atrobe den caso di disturbio ciudadano despues di un Brexit sin un acuerdo cu UE,” Sunday Times a bisa, citando un fuente no conoci di e Oficina di Gabinete di gobierno, cu ta maneha asunto sensitivo di gobierno.
The Mail on Sunday tambe a bisa cu nan a haya di tende cu tin plan pa move e famia real, incluyendo Reina Elizabeth, pa un luga sigur pafo di Londres.
Na januari, den un discurso anual di e Reina, cu tin 92 aña, na un grupo di hende muhe tabata ampliamente interpreta como un yamada na politiconan pa yega na un acuerdo tocante Brexit.
Jacob Rees-Mogg, Un parlamentario conservador cu ta fiel apoyante di Brexit, a conta The Mail on Sunday cu e ta kere cu e plannan a mustra panico innecesario di e funcionarionan tocante un Brexit sin acuerdo, pasobra miembro di cas real a yega di keda Londres den tempo di bombardeo durante segunda guera mundial.
Pero Sunday Times a bisa cu un ex-oficial di polis formalmente encarga cu proteccion real, Dai Davies, tabata anticipa cu Reina Elizabeth lo ser evacua di Londres si lo tin disturbio. “Si lo ta bay tin problema na Londres, claramente lo bo move e famia real bay otro sitio,” Davies lo a bisa.
