Gran Bretaña a tuma un paso grandi den direccion di salida di Union Europeo ora ayera representantenan den Camara a duna nan aprobacion preliminar na Prome Ministro Boris Johnson di partido Conservador pa sigui cu su ley pa concretisa e separacion for di Union Europe, despues di e eleccion cu a termina varios aña di un impasse politico na e pais.
House of Commons, den cual e banda Conservador a crece despues di e victoria di Johnson siman pasa, a vota 358-234 pa e ley di Acuerdo di Retiro, habriendo paso pa Gran Bretaña bandona Union Europeo otro luna, dia 31 di januari.
E voto di ayera tabata un triunfo pa Johnson, cu a logra un mayoria abrumador den parlamento den eleccion siman pasa cu un promesa di guia Gran Bretaña riba caminda pa separacion di Union Europeo.
Miembronan di su fraccion Conservador a reuni cu hubilo alrededor di e prome ministro despues di e votacion, pidiendo pa su firma riba nan copia personal. Miembronan di oposicion tabata para mira resigna.
Johnson a bisa den su discurso cu e ley lo pone un fin na amargura y angustia di ultimo añanan. Sin embargo, opositornan ta argumenta cu e salida lo solamente implica e inicio di e incertidumbre tocante e futuro relacion cu Union Europeo. Prome cu fin di 2020, tanto Gran Bretaña como Union Europeo kier tin nan relacion pa comercio, siguridad y otro area regla formalmente.
