E ta zona manera un simple advertencia na e politiconan y esnan cu ta apoya nan, mey mey di un invierno Britanico: Brexit, sigur uno sin un acuerdo cu Union Europeo, por percura pa un escasez di cuminda na e isla.
Cu e Brexit na 60 dia di bay tuma lugar, e distribuidornan mas grandi di cuminda a adverti e parlamentarionan cu ta den un impasse grandi con pa yega na un acuerdo tocante e salida di Union Europeo, cu nan por ta responsable pa menasa seguridad alimentario.
E ehecutivonan di e cadenanan di supermercado Sainsbury’s, Asda, Waitrose, grupo di detayista Marks and Spencer, como tambe gigantenan di fast food McDonald’s y KFC ta entre e 12 firmantenan di e carta di e organisacion British Retail Consortium (BRC).
Nan ta adverti cu e cadena di abastecimento a base di “just-in-time” o e cadena di “fresh supply lo por topa cu problema di continuidad den e caso di un Brexit sin deal cu UE. “Pa consumidor, asaki lo por reduci e disponibilidad y duracion riba shelf di hopi producto den nos tiendanan.”
Esnan cu ta apoya un Brexit, hasta den e caso di no tin un acuerdo, cu a argumenta asina largo cu Reino Uni mester sali di UE cu of sin deal, sin duda lo bisa cu tur esaki ta pa spanta hende. Pero con nan por sa sigur?
Comerciantenan detayista y esnan cu ta stock a base diario a cuminsa prepara stock te unda nan por, pero e espacio pa almacena ta yena caba y ademas esnan cu ta maneha producto fresco no por haci esey.
