E aprobacion di e plan original di Brexit, presenta pa prome minister Theresa May, a bira practicamente imposibel despues cu a pasa un amienda di procedemento den ‘House of Commons’ cu ta pidi pa presenta e parlamentarionan un plan Brexit nobo, den un ambiente caotico.
E amienda pa cu e plan, entrega pa e anterior fiscal general Dominic Grieve, ta duna May tres dia pa e entrega plannan nobo, si e perde e votacion diamars proximo, loke segun expertonan, lo sucede tambe riba e fecha ey.
E amienda a keda aproba cu 308 voto na fabor y 297 contra, mey mey di escena caotico cu parlamentarionan conservador criticando e Speaker, John Bercow, pa a permiti e amienda, cu ta habri caminda pa e Camara por cambia e proyecto presenta, y no cu solamente gobierno por haci esaki.
Pero Bercow, cu apoyo di parlamentarionan di Labour y conservadornan contra Brexit, a insisti cu e por tuma e decision, y cu el a scoge pa defende interes di e parlamento, riba esun di gobierno.
Un amienda previo di Grieve, pasa den parlamento prome cu Pasco, ta implica cu cualkier declaracion haci despues di un derota di un plan, riba su mes ta amendable, permitiendo parlamentarionan pa bin cu nan mes propuesta pa e proceso di Brexit.
Di manera cu, si May bolbe cu un plan alternativo, parlamentarionan por cambia e plan aki, dunando parlamento mas posibilidad pa dirigi e rumbo di e plan di Brexit.
