Ayera diabierna por a mira riba rednan social diferente potret di e driekiel cu a ser instala recientemente na rotonde di Eagle Beach, pero e biaha aki e potretnan tabata diferente unda tabatin un mensahe cune “No More Hotels.”
Un debate
Riba rednan social e accion aki a causa conmocion debi cu recientemente e obra aki di e artista Arubiano Gilbert Senchi ayera tabata protagonista y simbolo di protesta cu ta mustra cu esaki ta un pedido na Gobierno di Aruba pa stop di sigui construi mas hotel den e isla debi cu ta considera cu tin suficiente y cu mester puntra “dicon hende ta bay over na actonan asina? ta pasobra nan no ta haya oido.” Manera e parlamentario independiente Rycond Santos Do Nascimento a publica riba su Facebook page.
Igualmente turistanan tambe a trece e punto aki dilanti pa loke ta trata e construccion di Secret’s Hotel unda cu entre otro, nan ta señala cu e hotel aki “ta bay daña e zona trankil cu tin den area di Colony y ta bay bira un otro Palm Beach cu tin suficiente turismo caba.” Ta algun di e comentarionan di turistanan.
Pa otronan ta un acto cu no por laga na un banda debi na vandalismo cometi contra e obra cu por afecta Aruba como isla turistico, “Hopi tristo pa mira algun hende ta vandalisa obranan publico pa transmiti nan mensahe. E hendenan aki no ta consciente cu nos ta biba y depende di turismo! Un acto inaceptabel y condenabel.” Tabata e reaccion di minister di Turismo Dangui Oduber e dia di ayera.
Siguientemente, e mandatario a sigura cu “esnan cu ta vandalisa nos pais: turismo ta genera 4.5 biyon florin pa nos economia”, pa loke diferente usuario a reacciona y bisa “cu lo ta bon pa busca otro manera pa genera placa y pa stop di depende riba turismo” y tambe un otro usuario a indica cu 70% di e poblacion ta depende di turismo no ta husto cu par di hende sin escrupulo ta perhudica full un pais. Mester bin castigo severo pa e personanan aki.”
Minister di Cultura y Finanzas, Xiomara Maduro tambe a duna su opinion tocante esaki y a bisa cu “nos no mester boicotia nos pais. Tin diferente manera pa expresa, pero esaki no ta esun corecto. Ban balora tur esfuerso cu ta wordo haci na bienestar di Aruba.”
Pa presidente di Parlamento di Aruba, Edgar Vrolijk, e accion di protesta aki tampoco a cay den bon tera y riba su rednan social el a publica cu “Awe e grupo cu ta sinta skirbi tabata bati man y grita duro ainda falta. 2017:nos a drenta gobierno y a haya 7000 toezegging pa camber di hotel na Aruba duna pa loco door di Sevinger. A bay corte y otronan ainda por a para y a reduci esaki na mita y awendia tur hende ta wak e resultado di e mita di 7000 camber corda si no a bringa pa reduci esaki y cu awo tin un moratorio riba mas hotel. Mi tampoco ta feliz cu e explosion di hotel pabao di Aruba pero esey no kiermen mi ta apoya vandalismo y destruccion na un propiedadnan.”
Camaranan instala
Ta momento pa puntra si e proyecto cu a ser anuncia lunanan atras tocante implementacion di mas di 250 camara di siguridad na cierto areanan ta trahando di un manera optimal y asina por a mira ken ta e persona cu a realisa e accion aki y si lo tin consecuencianan hudicial.
Pero e rotonde di driekiel no ta e unico luga cu tambe a haya un graffiti, ta parce cu e persona a bay core rond Aruba pa mustra su mal contento y tambe a coloca su “arte” den un otro muraya na un cas di Colony segun por a compronde y na walk way di Eagle Beach manera e potret ta ilustra.
E obra di driekiel
E obra aki yama “Mama Driekiel” aki a ser traha na Bogota, Colombia for di aña 2019 y ta simbolo di esfuersonan di cooperacion pa protege e turtuganan marino cu ta den peliger di extincion na Aruba y na henter mundo.
Maner e mesun artista Senchi a indica, Aruba ta conoci mundialmente como un luga unda e turtuganan ta pone nan webo for di basta añanan caba y esaki ta un forma adecua di dignifica y respeta e ritual natural na Aruba cu ta representa bida nobo, abundancia, bon energia na unda tur hende kier bin back siguiendo e circulo di bida aki.
Diasabra di siman pasa e driekiel a yega na su destino cu ta e rotonde unda e ta ubica awor na Eagle Beach y cu for di e prome dia a bira un atraccion turistico y ayera tabata un simbolo di debate.
