(NLTimes) – A causa di e escasez di vivienda na Hulanda, hopi studiante cu ta graduando no por muda for di nan vivienda di studiante pa motibo cu nan no por haya vivienda accesibel. Esaki ta causa cu nan ta haya manera di keda den e cambernan pa medio di atrasa nan graduacion of registra pa un curso nobo segun RTL Nieuws a reporta.
Peter, cual no ta su nomber real, a completa su master’s na Leiden University. Sinembargo te ainda e ta registra como studiante pa e no mester sali for di e vivienda, un flat den centro di Leiden. “Mi no ta ricibi ningun les,” el a conta RTL. “Net prome cu mi a completa mi master’s, mi a registra pa un di dos.”
“Oficialmente, bo tin cu sali for di e cas na momento cu bo gradua. Sinembargo haya un otro cas ta practicamente imposibel pami,” Peter a bisa. “Mi a registra pa vivienda social, pero e periodo di espera na Leiden ta 9 aña. Pa motibo cu actualmente mi ta traha part-time, mi no ta gana suficiente pa e mercado di huur normal.” E ta buscando un trabao full-time pero mientrastanto ta sigui paga pa scol pa asina e por keda den e vivienda di studiante. “Mi ta paga alrededor di 2,300 euro pa aña. Esaki ademas di mi huur mensual ta keda mas abao cu huur propiedad den e mercado actual.”
Stadswonen, un asociacion di vivienda di studiante na Rotterdam a bisa cu ta “frustrante” cu e hobennan ta haya manera pa keda den e vivienda despues di nan estudio. “E situacion aki ta pone studiantenan cu ta buscando cas contra e grupo di studiante cu no kier sali for di e cas.”
Sinembargo, e asociacionnan di studiante ta compronde nan problema. “E escasez di vivienda pa studiante ta halto,” un vocero di e asociacion di vivienda pa studiante DUWO a conta e noticiero. “Sinembargo vivienda despues di caba estudio tambe ta dificil pa haya. For di e perspectiva di e problema, mi ta imagina cu hopi biaha tin frustracion y sufrimento y hende no sa unda pa bay.”
