Aruba tin necesidad grandi pa mas hurista specialisa den traha ley y awor orguyosamente nos a haya 18 acerca na nos isla. Tur a gradua como un ‘Certified Legislative Lawyer’. Siendo e prome grupo cu a participa na e curso cu a dura mas of menos un aña di tempo, nan a ricibi nan diploma for di man di Minister di Husticia, Siguridad y Integracion, mr. Andin Bikker. 

Practicamente tur area di sociedad ta reglamenta door di ley y tur plan di gobernacion ta encera introduccion di leynan nobo of cambio di leynan existente. P’esey ta importante pa amplia e cantidad di huristanan specialisa pa traha conceptonan di ley. Den e cuadro ey, desde presupuesto di aña 2018 Minister Bikker y Gabinete Wever-Croes a pone como un prioridad di maneho, creacion di oportunidad pa por train huristanan den e specialismo di traha conceptonan di ley. Esaki a bira un realidad a base di un cooperacion entre Caribbean Center for Legislation di Universidat di Corsou y Ministerio di Husticia di Aruba, cu establecimento di un ‘Aruba Desk’. Pues e mandatario ta hopi contento di por a logra e proyecto importante aki pa nos isla.

E curso a start cu 47 participante di Corsou, Aruba y Sint Maarten y na final 40 a gradua. Di e participantenan di Aruba, 18 a keda cla y 2 tin e oportunidad pa pasa “her” pa ainda ricibi nan diploma. E graduadonan di Aruba ta: Helena Croes, Milko Baiz, Anouk Balentina, Vivian van der Biezen, Carlos Guiamo, Indra Duarte, Mireille Henriquez, Kitty Obergh, Giovanni Jacobs, Carondina Leijdekkers, Amanda Maduro, Jeannine Marsman, Zamira Paesch, Ilona Sneek, Valerie Wanga, Wendy op de Weegh, Margarita Werleman y Jessica Winterdaal.

Minister Andin Bikker tabata mas orguyoso ainda di e grupo aki pasobra entre e participantenan di Aruba 4 a logra un “judicium”. Dos a termina nan estudio cu e judicium “Met Genoegen”, cu ta encera cu nan punto final ta un averahe di 7,5 y nunca a haya un punto mas abou cu 7. Esunnan di Aruba cu a logra esaki ta: Milko Baiz y Carondina Leijdekkers. Dos participante a logra e judicium maximo di ‘Summa Cum Laude’. Ta trata aki di Ilona Sneek y Valerie Wanga. Pa caba e curso cu e judicium aki, ta nifica cu nunca a haya un punto bou di 8,5 y un averahe di 9. Bale la pena informa cu den e caso di Valerie Wanga, e no kier a core ningun risico, pasobra el a logra puntonan manera 9,5 y nunca bou di un 9, cual a wordo considera como un “werkelijk een verbluffend resultaat”.

Durante un ceremonia cortico na Renaissance Convention Center, a entrega e diploma na tur e graduadonan, pero tambe na e cuaternan cu a caba e curso den gran forma. E ceremonia a wordo inuagura cu un presentacion instrumental di nos himno di Aruba door di un di e graduadonan, Anouk Balentina. A reconoce Milko Baiz y Carondina Leijdekkers cu a caba cu puntonan superior, den cual a duna nan e titulo di “Met Genoegen”, mientras cu Ilona Sneek y Valerie Wanga a caba e curso cu ‘Summa Cum Laude’. Nan tur cuater a ricibi un plakkaat di reconocimento for di Gobierno di Aruba, como muestra di aprecio pa nan esfuerso haci. Entretanto a cuminsa e curso nobo cu un otro grupo di participante cu aki un aña tambe lo por ta un “wetgevingsjurist”.