(NLTimes)—Menos hende muhe na Hulanda ta scogiendo pa haya muchanan, segun CBS Hulanda a reporta diaranson cu e grado di fertilidad—e cantidad di muchanan naci pa cada muhe durante su periodo di fertilidad. Menos mucha ta nace pa cada muhe, pero e cantidad di mucha pa mama ta keda mescos. Pues, mas hende muhe ta keda sin yiu.
E grado di fertilidad na Hulanda a cay gradualmente desde 2010 y awo a yega un record di 1.49 yiu pa cada muhe. E caida den e cantidad di hende muhe hayando yiu ta fuerte entre hobennan cu un nivel abao di educacion. E grado di fertilidad tambe a cay entre hende muhe cu nivel di educacion halto, pero menos skerpi.
CBS ta pensa cu e caida fuerte entre hende muhe cu un nivel di educacion abao por ta debi na nan posicion socioeconomico zwak. Nan por dicidi pa no haya yiu pasobra nan no tin placa pa esaki. E caida den e grupo aki tambe ta mas pronuncia pasobra, en averahe, nan ta bira mama na un edad mas jong compara cu hende muhe cu educacion mas halto.
CBS a subraya cu no tin ningun motibo aparente pa e caida den grado di fertilidad na Hulanda. “Ta parce cu tin un combinacion di diferente patronchi, den cual nivel di educacion ta un di e factornan,” manera CBS a confirma. Tambe el a agrega cu e grado cayendo no ta unico pa Hulanda—mayoria pais Europeo ta mustra desaroyonan similar.
E grado di fertilidad ta un indicator fuerte di con un poblacion di un pais lo desaroyo. Un pais mester un grado di fertilidad di 2.1 pa mantene un poblacion stabiel. Un grado demasiado abao lo resulta den un futuro cu menos residente trahado compara cu un grupo grandi di hendenan mayor den e poblacion. Un grado riba 2.1 ta aumenta e poblacion di e pais y ta reduci su averahe di edad.
Grado di fertilidad no ta e unico factor den desaroyo di poblacion. Migracion tambe ta hunga un rol importante. E estudio aki pa CBS tambe a enfoca solamente riba hende muhe naci na Hulanda.
