Como seis luna pasa, september 2019, a cuminsa un proyecto unico den su categoria na Aruba. A lanta Stichting Leerorkest Aruba, cu e meta di crea un ambiente den cual mucha di nos scolnan basico por haya cierto educacion den musica, incluyendo siña domina un instrumento musical.

Meta no ta primordialmente selecciona talento musical sobresaliente, sino brinda acceso amplio na un grupo cu talvez no tin e recursonan pa esaki, na un enrikesimento di nan bida personal a traves di musica.

Redaccion di Bon dia Aruba tabatin un entrevista cu presidente actual di e fundacion, sra. Grace Maduro, cu a conta nos di e desaroyo cu a tuma lugar den e prome fase aki, y kico ta e plannan pa logra proximamente.

E proyecto Leerorkest ta surgi originalmente na Hulanda, specificamente dedica na e barionan menos faboreci di Amsterdam Zuid-Oost, pa duna e poblacion hubenil, pa gran parti di descendencia inmigrante, den e encuentro cu musica aki un dimension significativo den nan bida. Ta spera tambe cu esaki lo ta un estimulo pa mantene hubentud riba e caminda corecto, cu efecto positivo riba e creciente problema di delincuencia hubenil. P’esey tambe e interes, na Hulanda y aki, di ministerio di husticia. E proyecto no ta algo desliga di e ambito escolar, pero ta intenciona pa integra den enseñansa basico regular, loke ta splica interes di e ministerio ey tambe.

Grace Maduro: “Na Aruba desde prome momento cu a tuma iniciativa aki, unda mester menciona Johnny Croes di Scol di Musica, como fundador, como tambe e ministronan encarga cu enseñansa y cu husticia, cu a mira e necesidad y oportunidad pa join e esfuerso Hulandes riba e tereno aki. Na e otro islanan tambe tin un proyecto similar, pero nos ta concentra naturalmente riba nos propio esfuerso. Den e fase inicial aki nos ta depende di subsidio for di Hulanda, pero ta logico cu despues di cierto tempo nos mester por carga nos propio organisacion.”

“Ademas, e idea ta cu e proyecto (piloto) cu nos a inicia, ta bira algo cu ta integra na e scolnan basico, y cu recursonan gubernamental lo ta disponible pa carga esaki. Nos a start awor cu un ‘pilot’ na dos scol, na Prinses Amalia y na Laura Wernet Paskel. E plan tabata pa cuminsa na cuatro scol pero pa motibo di contratiempo nos ta un poco atrasa cu e otro dosnan.”

Nos ta cuminsa cu mucha den di dos aña di scol basico, cu loke ta yama ‘Algemene Muzikale Vorming’ (AMV) y canto. Despues, den e siguiente añanan, ta sigui cu e formacion a base di dominio di un cierto instrumento. Esaki ta bay te na 6de klas di scol basico. Esaki ta implica cu den 5 aña nos mester a desaroya e prome trayecto completo pa scol basico, segun cu e muchanan cu awor ta den 2de, lo a yega klas 6.

Kico concretamente Hulanda ta yudando actualmente?

GM: “Pa cuminsa tin e ayudo financiero pa nos por opera durante henter e trayecto menciona. Por ehemplo, mester paga e docentenan cu ta haci e trabao y pronto nos mester un edificio pa nos por opera di eynan. Na prome instante nos a haya un lote di 144 instrumento, e.o violin, dwarsfluit, klarinet, hobo y algun mas, banda di uso di guitara y piano. E cantidad di instrumento lo aumenta segun cu e programa ta crece.”

“Nos ta bay tin tarea cu awor aki no ta bin dilanti ainda, pero cu sin duda nos mester tin un contesta pa nan. Por ehemplo, cu tanto instrumento ora e proyecto keda amplia, nos mester tin un deposito sigur y adecua pa warda esakinan. P’esey un edificio adecua lo ta importante. Lo mester bin capacidad tambe di hende cu por mantene y drecha instrumento, pasobra bo no por pensa cu no ta pasa nada cu tanto instrumento. Nos por pensa por ehemplo pa train hende den esaki, cu ta un ofishi special. Djis pensando, esaki por ta algo cu por haci den KIA?”

“Tin otro aspecto pa desaroya tambe. E plan ta cu na IPA lo cuminsa curso cu ta termina cu un certificado pa esnan di e instituto cu ta haci e carera special aki, dirigi riba e (AMV) y canto. Esey por percura pa e hendenan cu training adecua pa sostene e programa pa por amplia esaki na mas scol. Tambe nos ta pensa di involucra musiconan cu a haya nan formacion musical profesional den exterior, pa haci uso di nan conocemento tambe den e proyecto.”

Proximo evento publico

Ta e idea pa e proyecto piloto no keda for di publicidad, pero e plan ta pa mustra kico ta resultado di e trabao den e prome aña caba. P’esey ta intencion di duna un presentacion musical, cu participacion di alrededor di 240 mucha. Fecha pa esaki ta 29 di juni, lugar lo ser anuncia despues.

GM: “ Cu e apoyo adecua, tanto di gobierno como e cooperacion di esnan envolvi den musica o cu kier traha den e proyecto aki, esaki por bira algo grandi pa Aruba.”