Como hopi studiante cu a laga e isla, Clyo Abath a haci di Hulanda su segundo cas. Den e entrevista aki e ta conta Bon Dia Aruba, e hoben di 24 aña kico e ta haciendo leu fo’i cas y kico su plannan nan pa futuro ta.
Segun Abath, laga su dushi Aruba atras no tabata facil, pero mas bien necesario. E hoben ta elabora :” Den mi opinion e ta sumamente necesario pa asina engrandece bo conocemento di bida, siña ta mas tolerante, siña conoce otro cultura y tambe siña con pa anda cu cualkier situacion cu bo haya bo den dje.”. E ta comparti cu el a caba MAVO na 2010, e tabata bay Mon Plaisir College y el a muda bay Hulanda pa sigui cu su estudio.
Insiguridad
Ora cu el a caba MAVO, e no tabata sigur kico e kier a haci. E hoben ta comenta cu el a dicidi di haci HAVO na Hulanda.”Despues di a sigui Havo algun luna, mi a sigui 2 estudio riba nivel MBO, esta Pedagogisch Jeugdzorg y International Hotel & Management. E ultimo estudio mi a haci pa 2 aña ya cu durante e temporada ey mi por a orienta mi mes mas miho y tabata sa kico mi tabata kier y no kier. Y locual mi tabata kier tabata pa haci “toelatingsexamen” pa HBO. Mi a haci esaki y mi a wordo admiti.” Abath ta bisa.
Politica Europeo
Bon Dia Aruba a puntra Abath, kico e ta haciendo actualmente y dicon, pa cual el a contesta: “Actualmente mi ta studiando European Studies na De Haagse Hogeschool. European studies ta un estudio comparti den politica Europeo, business en general, diferente idioma por ehempel: Ruso, Chines, Frances y Aleman. Semper mi tabata un persona cu afinidad grandi pa idioma, tin e motivacion pa yuda otro y tambe pa para contra inhusticia. Esaki nan tabata e factor nan crucial pa mi a kies mi estudio. Mi a scoge e estudio aki pasobra mi por combina mi pasion cu mi futuro. European Studies ta duna mi opcion di por haci tur esey. Mi a studia Spaño na nivel avansa y tambe Italiano. Verder mi studie ta duna mi un miho bista ariba e nivel di politica cu tin rond mundo y con cada gobierno ta maneha nan pais. Pero cu un enfoke mas riba pais nan Europeo.
Durante mi estudio mi a haci diferente sondeo y entre nan un sondeo encuanto Derecho Humano. Nos a bishita diferente luga nan entre otro Parlamento Europeo na Brussel, International Criminal Court (ICC) na Den Haag y tambe Vredespaleis na Den Haag. Durante e bishita nan aki nos ta haya e chens pa wak con e institucion nan aki ta traha y durante nos bishita na ICC nos a haya chens pa sinta den publico durante un caso cu tabata andando cual pa mi tabata hopi impresionante. “
Gosa di bo estudio
Abath ta finaliza cu un palabra di conseho pa hobennan Arubiano cu kier studia afo.
Pa nan no laga hende bisanan cu nan soñonan ta mucho chikito of mucho grandi, ta nan so por dicidi esey. E ta subraya “ Busca ayudo na tempo. Si bo ta sinti cu bo no por handle un situacion, busca ayudo y no tene ningun clase di berguensa. Bo problema nan tin biaha ta mas chikito di loke bo ta pone mustra, Busca informacion corecto encuanto estudionan pa wak cua lo bo scoge y busca contacto cu e mentor nan concerni di bo scol. Tuma iniciativa, pa bo no haja bo cu sorpresa. Si ta un cos cu mi por recomenda ta gosa. Pero gosa di e hecho cu bo a haya e oportunidad pa studia y di e periodo cu bo ta studiante. Tin asina hopi cos nobo cu lo bini riba bo caminda y tur ta sirbi como experiencia personal. No ta tur hende ta haya e oportunidad aki. Nos tin di hasi bon uso di dje. No neglicia of negocia bo identidad: bo ta bai biba na un pais totalmente diferente cu di nos y bo lo mester adapta na nan custumbernan, norma y balornan. Ta na abo pa por haja e balansa entre bo norma y balornan di bo cas y esnan di Hulanda. No lubida di unda bo ta bini y sea orguyoso di menciona cu ta Arubiano bo ta!”
Abath ta bisa cu aki 10 aña e ta spera di por ta bek na Aruba aportando na e bienestar di nos pueblo y nan derecho nan humano. E ta kere firmemente den igualdad pa cada un di e ciudadanonan cu ta biba ariba Aruba.
