E grupo musical mas reconoci pa su canticanan na Aruba, a cuminsa na 1968 for di un famia musical. Cada un di e miembronan di famia tabata domina un instrumento y tur aña prome cu Pasco, e grupo tabata toca hunto, pero nan no tabatin un nomber oficial.

E mesun aña, ora cu e rumannan di famia Croes a bin for di Hulanda, e grupo a formalisa y a haya e nomber ‘Betico y su grupo’. Manera henter comunidad sa, Betico ta conoci como un personahe grandi na Aruba y hopi hende ta reconoce tambe como ‘Libertador di Aruba’. El a funda e grupo y asina a carga su nomber den e prome 20 aña. Despues cu el a fayece, tabata kier a mantene su nomber como fundado, pero tambe como un personahe, y e ora ey e grupo a cambia su nomber pa ‘Grupo di Betico’.

Durante un entrevista special cu Bon Dia Aruba a tene cu Gos Oduber, integrante di e grupo musical aki, el a splica cu nan a cuminsa graba na aña 1990 cu ‘Paranda Arubiano’. Prome cu esey tabata mas bien canticanan tradicional cu influencia di Aruba y Venezuela.

Ora cu e generacion nobo a drenta den e grupo, a nace e idea pa bin cu nan mesun canticanan y for di esey nan a saca caba mas di 100 cantica riba diferente CD.

Oduber a trece dilanti cu ta confundi e grupo cu gruponan di gaita, pero nan no ta toca gaita. Nan ta un grupo di paranda, un tipo di musica cu hende por move di un porta pa otro. Tambe estilo di musica ta diferente, ‘e tin su propio identidad, na momento cu bo ta scucha ya bosa cu ta Grupo di Betico’, Oduber a sigura.

El a comenta cu pa nan ta importante cu tur generacion por reconoce nan musica y nan ta purba tambe pa esey ta mas facil pa compronde, desde esunnan mas chikito te esunnan mas grandi.

Oduber a expresa cu e tipo di musica cu cual nan a cuminsa, compara cu awor, ta diferente. Esaki pa motibo cu antes nan tabata toca pa alegra y entretene, y awendia nan ta haci esey mas profesional, cosnan a cambia na caminda.

Aworaki, e grupo ta conforma pa mas o menos 16 hende homber, pa motibo cu esey ta e identidad cu nan a crea pa e grupo. Desde un par di aña pasa nan a cuminsa graba cu artistanan internacional, cu a trece un tiki variacion den nan stemnan, causando cu a bira un icono den sociedad. Hopi artista kier canta cu nan y Oduber a expresa cu nan ta aprecia esey masha hopi mes.

Tocante esaki, el a declara cu nan a cuminsa graba cu otro artistanan pa celebra e 50 aña di e grupo. Nan a organisa un concierto grandi y nan a comparti cu diferente artista cu ta admira e grupo; pero tambe tabatin esunnan cu nunca a haya un chens. P’esey nan a dicidi cu lo continua y nan a graba cu Jeon e aña aki, su propio composicion cu e mes a skirbi.

“Hopi biaha bo por kier habri hala pa crea mas oportunidad, uni forsa cu otro cantantenan ta haci cu bo ta yega mas leu, pero tambe bo ta ofrece mas di loke bo tin”, Oduber a señala.

Pa 2020, Oduber a afirma cu nan tin un par cantica cu nan a compone caba. Ta graba canticanan pa motibo cu ‘esey ta tene e grupo bibo, bo fanaticonan ta pendiente di bo’. Igualmente el a declara cu ‘un fin di aña sin Grupo di Betico no ta un fin di aña, esey naturalmente ta haci nos feliz’.

Oduber a splica cu nan y Aruba henter ta celebra e temporada di fin di aña den grandi. Durante e aña, hende ta ocupa cu mil y otro cos, pero na momento cu Pasco ta yegando, e sentido festivo di Pasco ya ta cuminsa influencia e pueblo completo. En berdad e Grupo di Betico a nace durante epoca di fin di aña pa celebra Pasco y Aña nobo.

Pa finalisa, el a sigura cu Pasco ta hopi importante pa nan, pa motibo cu ta un celebracion grandi y e ta kere cu tambe ta un temporada pa hende reflexiona riba kico a pasa durante aña. Nan lo sigui mantene e tradicion aki. El a duna como mensahe den e temporada aki pa tur hende celebra un Pasco bunita den seno familiar, pa reflexiona pa e aña cu ta bini trece prosperidad y cosnan bunita.