Google lo por ta un di e companianan mas grandi produciendo smartphones den mercado, pero cu nan anuncio recien nan ta purba curasha personanan pa baha man riba uza nan telefon.

Yama e Telefon di Papel (Paper Phone), e compania gigante su experimento mas recien kier promove ‘digital wellness’ por medio di ofrece un solucion na adiccion di smartphone. Cu esaki usuarionan lo por keda henter un dia sin uza nan smartphone por medio di pone tur informacion necesario manera detayenan di contacto, direccion di mapa y meetingnan den un booklet chikito cu por imprimi.

“Hopi hende ta sinti cu nan ta enfoca mucho riba nan telefon y nan ta perde riba momentonan real dilanti nan wowo. Pero ta dificil pa uza nos telefonnan menos paso awo nos ta depende riba nan hopi”, un video mustrando e Paper Phone ta bisa.

Google no ta e prome compania di tecnologia cu ta pone cosnan similar den nan productonan. Apple su ultimo update di iOS 12 ta inclui un feature yama Screen Time cu ta laga usuarionan impone restriccionnan riba con hopi nan por uza nan iPhone of iPad. Google mes tambe a inclui featurenan similar den Android, cu appnan manera Digital Wellbeing, cual ta laga bo regula con hopi tempo diario bo mag ta den cierto appnan.

Varios estudio ta demostra cu e uzo di social media y di smartphone excesivo por tin efecto negativo riba salud mental. Den september di e aña aki, Royal Society for Public Health (RSPH) a launch Scroll Free September unda a purba curasha hende pa tuma bek control di e tecnologia den nan bida y baha man riba social media.

“Hopi di nos ta uza social media di mas y aunke tin varios beneficio pa uza e plataformanan cu ta disponibel, ta importante pa tuma un tiki tempo fuera di esey”, Chris Elmore, presidente di e grupo parlamentario tratando social media y salud mental di hende hoben, a bisa.

“Si ta trata di scroll riba bo telefon prome cu bo bay drumi, sigui cuentanan cu ta demasiado irealistico cu ta daña bo self-esteem, of si ta cu e telefon ta obstaculisa bo di tene interaccionnan real cu bo amigonan y famia”.

Esaki ta refleha un trend actual unda ta enfocando mas y mas riba desconecta di medionan social pa bienestar di salud mental. Asina Ex diseñador etico na Google Tristan Harris, kende a habri su propio fundacion enfoca riba etica di tecnologia, a yega di argumenta cu e industria di tecnologia ta den un ‘race to the bottom of the brain stem’ y cu diseño di tecnologia tin cu mehora humanidad en bes di pone den peliger. E concepto di ‘time well spent’ ta un concepto cu ta referi hopi na dje pa ehecutivonan di Silicon Valley, incluyendo CEO di Facebook Mark Zuckerberg.