Google ta bisa cu no lo permiti aviso mas pa productonan of servicionnan pa track of monitor otro persona sin nan permiso.
Den un update di politica, Google a bisa cu esaki lo aplica na spyware y tecnologia usa pa vigilancia di partner intimo, incluyendo tecnologia pa monitor mensahe di texto, yamada of historia di browsing. Tambe ta aplica na trackernan di GPS cu ta ofrece pa spiona riba un persona sin nan permiso, ademas di ekipo di vigilancia manera camara, grabador di audio, dash cam y nanny cam cu ta ofrece pa e proposito di spiona.
Google a bisa cu servicionan di investigacion priva y servicionan pa mayornan track of monitor nan yiu menor di edad no ta inclui. E politica di ‘Permiti Comportamento Deshonesto’ lo drenta na vigor dia 11 di augustus.
“Constantemente nos ta evalua y actualisa nos politica di aviso pa sigura cu nos ta protege e usuarionan”, un vocero di Google a bisa den un declaracion. “Rutinariamente nos ta actualisa nos lenguahe cu ehempel pa yuda clarifica loke nos ta considera violacion di politica. Tecnologia di spyware pa spiona riba partner semper tabata den nos politicanan contra comportamento deshonesto.”
Segun Google, politica di aviso di e compania ya tabata prohibi promocion di producto y servicio cu ta resulta den un usuario hayando acceso no autorisa na sistema, aparato of propiedad, pero e actualisacion aki ta cambia lenguahe di e politica pa inclui promocion di spyware y tecnologia di vigilancia cu enfoke riba acceso no autorisa na aparatonan di partner intimo, Google a bisa.
