Google a anuncia actualisacionnan pa su assistent di bos di inteligencia artificial (AI) y hermentnan nobo di privacidad, pa duna hende mas control riba con nan ta wordo track riba caya of den nan mesun cas.
CEO Sundar Pichai a habri e conferencia anual di desaroyado di e compania diamars, notando cu e compania kier haci mas pa keda na vanguardia di ‘expectativa di usuarionan cu ta evoluciona constantemente’ riba privacidad.
Den un apelacion pa preocupacion tocante tracking di ubicacion constante, e compania lo cuminsa habilita usuarionan di su mapanan digital pa sconde nan identidad pa preveni nan ubicacion wordo graba.
E compania ta ofreciendo su control nobo di privacidad, ‘Incognito’, entre scrutinio cada bes mas intenso tocante cuanto informacion di usuario e companianan di tecnologia mag di colecta y bende pa propaganda comercial. Facebook a dedica hopi di su propio conferencia siman pasa pa conecta hende mediante mas canalnan priva na luga di ampliamente riba e red social.
Modo ‘incognito’ pa largo ta ofreci riba varios browser, incluyendo Google Chrome, maske sign in riba bo cuenta generalmente ta nenga esaki, sikiera parcialmente.
Safari di Apple y Firefox di Mozilla ya caba tin varios herment pa privacidad den dje, pa block paginanan cu kier track e actividad online di hende pa nan por bende aviso basa riba nan interes y ubicacion percibi.
E version mas recien di Google Android tambe lo alerta usuarionan ora appnan por ta explotando acceso na data di ubicacion di telefon. Un control di privacidad lo corda usuarionan ora un app cu no ta actualmente bou uzo ta haya acceso na nan ubicacion, y lo permiti e usuarionan stop e.
Android Q, manera e sistema nobo ta conoci actualmente, tambe lo permiti usuarionan restringi acceso na ubicacion mas generalmente – door di limita esaki na ora e app ta den uzo. Stephanie Cuthbertson, senior director pa Android, a referi na data di ubicacion como ‘un di bo informacion di mas personal’ durante un presentacion.
Data di ubicacion ta un tema doloroso pa Google. Na 2018, un investigacion di AP a haya cu Google tabata continua warda informacion di ubicacion di celular ora usuarionan a opta pa stop e ‘location history’ riba Android.
E compania tambe a bisa cu lo haci mas cla na usuarionan ki data ta wordo colecta pa su linea Nest di aparatonan conecta riba internet na cas. Y a gaba e recien anuncia funcion di auto-delete, cu ta permiti hende pone un limite pa con largo nan historia di ubicacion ta warda prome cu elimina esaki.
Google ta bisa cu su assistent lo por reserva auto y ticketnan uzando formulario online riba celular Android e aña aki. E tecnologia tras di esaki, yama Duplex, a ser lansa cu hopi fanfaria aña pasa, ora Google a demostra esaki haciendo un yamada pa reserva na un restaurant.
E assistent tambe lo wordo reduci pa e por traha directamente den un celular, eliminando e necesidad pa comunica cu e cloud server di Google pa compronde algun comando. E capacidad pa celular so lo ta disponibel riba e Pixel e aña aki.
