(AP) – Riba diaranson Google a tuma un paso grandi den e direccion di promove nan producto Pixel riba un caminda cu Apple y su gran seleccion di producto a crea.
E adicion mas recien na e marca cu tin 6 aña caba yama Pixel lo inclui Google su prome smartwatch cual ta haci uso di e funcionnan y experiencia gana despues di aña pasa su adkisicion di Fitbit na balor di 2.1 biyon dollar.
E holoshi nobo aki, cual lo keda lansa proximamente, ta marca Google su prome intento grandi y oficial di crea un nomber pa nan mes den tecnologia cu por bisti, un mercado cu a keda crece constantemente despues cu Apple a introduci su Applewatch den aña 2014. Te cu awo, Google su presencia den e mercado aki tabata limita na traha un version di su sistema di operacion Android pa holoshinan crea pa otro companianan.
Google tambe a usa su conferencia anual pa duna revela un Pixel Tablet cu tin planea pa lansa otro aña y asina competi cu Apple su iPad.
Ademas di revela nan productonan binidero, Google tambe a revela e proximo version di nan sistema di operacion Android, cual ta e sistema cu mayoria di telefon fuera di Apple su iPhone ta usa pa opera. Tambe el a destaca varios avanse den e area di inteligencia artificial.
Google su enfasis riba dispositivonn nobo ta señala cu un compania cu ta miho conoci pa su sitio web y otro programacion popular riba internet tin tur confiansa cu nan ta cla pa maneha, diseña y fabrica productonan fisico. El a lansa su prome celular Pixel den aña 2016.
“E ta tuma hopi tempo pa crea e capacidad, y awo boso ta bira hopi visiblemente cu e tecnologia por keda expresa via di varios diferente producto,” Rick Osterloch, un ehecutivo a cargo di Google su division di dispotivo a comenta.
