(AP) – 3 aña atras, Google a pone den marcha un plan ambicioso pa atende cambio di clima pa medio di bira “net zero,” nificando cu e no lo tin emision mas halto di gasnan cu ta cambia clima di loke nan ta kita for di aire.
Sinembargo un rapport di e compania diamars ta demostra cu e no ta cerca di cumpli cu e meta aki. Na luga di cay, su emisionnan a aumenta cu 14 porciento den 2023 durante e aña prome. Compara na su linea base den 2019, su emisionnan a aumenta te na 48 porciento.
Google a cita inteligencia artificial y e exigencia cu esaki ta pone riba centronan di data, cual ta rekeri cantidadnan masivo di electricidad for di aña pasa su crecemento.
Crea e electricidad aki pa medio di kima carbon of gas natural ta emiti gasnan, cual ta inclui carbon dioxide y methaan, cual ta causa daño na e planeta y ta trece tempo mas extremo.
E compania a haci un di e compromisonan mas significante di clima den e industria y te cu awo tabata un lider den esaki.
Lisa Sachs, director di Columbia Center on Sustainable Investment, a bisa cu google mester ta haciendo mas trabao pa partner cu companianan mas limpi y inverti den e red electrico.
“E realidad ta cu nos ta leu di loke nos por ta haciendo caba awo cu e tecnologia cu nos tin, cu e recursonan cu nos tin, y den termino di avansa e transicion,” el acomenta. Hefe di sostenibilidad na Google Kate Brandt a conta The Associated Press cu “yega meta aki di net zero pa 2030 ta un meta sumamente ambicioso. Nos sa cu e no lo ta facil y cu nos metodo lo mester sigui evoluciona,” Brandt a comenta, agregando cu “e lo rekeri pa nos nabega hopi incertidumbre, incluyendo e incertidumbre alrededor di e futuro di AI su impacto ambiental.”
Algun experto ta bisa cu e centronan di data cu ta expandiendo rapidamente necesario pa duna poder na AI ta menasa henter e transicion na coriente limpi, un parti importante den atende cambio di clima. Esaki ta pa motibo cu e centro di data nobo por atrasa e ceramento di planta di cu ta kima combustibel of causa cu lo construi un nobo. Centronan di data no ta solamente intenso den consumo di energia, nan ta rekeri lineanan di transmision di voltahe halto y tin mester di cantidadnan significante di awa pa keda friu. Tambe nan ta causa hopi zonido.
Pa e motibo aki hopi biaha nan ta construi unda electricidad ta mas cheap, no unda energia renovabel manera biento y solo, ta un fuente clave di energia.
Exigencia di centro di data global y electricidad di AI por bira dobel pa aña 2026, segun International Energy Agency.
Otro plannan grandi di sostenibilidad den tecnologia tambe ta desafia pa e proliferacion di centronan di data, e compania a bisa den un rapport di sostenibilidad ambiental den mei.
E companianan di tecnologia ta haci e caso cu AI, incluyendo hermentnan manera ChatGPT, no solamente ta causando parcialmente cambio di clima, sino tambe ta yudando atende esaki.
Den e caso di Google, esaki por nifica usa data pa anticipa inundacionnan den futuro of haci fluho di rafico mas eficiente pa spaar gasolin.
Amanda Smith, cientifico di Project Drawdown, a bisa cu esnan cu ta usa AI, ambos compania grandi y individuonan cu ta haci meme, tin cu haci esaki di manera responsabel, cual ta nifica usa e energia solamente ora cu e ta beneficia sociedad.
“E ta keda na nos ser humano pa wak kico nos ta bay haci y cuestiona dicon nos ta haci loke nos ta haci,” Smith a agrega. “Ora cu e ta bal la pena, nos por sigura cu nos sigura cu e exigencianan aki lo ser cumpli cu fuentenan limpi di energia.”
Google su emision a crece aña pasa parcialmente pa motibo cu e compania a usa mas energia; 25,910 gigawatt-hours mas, un aumento di e aña anterior y mas di dobel di e energia cu a consumi 4 aña anterior. Un gigawatt-hour ta practicamente e energia cu un planta di energia cu ta provee miles di vivienda ta produci den un ora.
Di e banda positivo, mientras cu Google su uso di consumi a crece, tambe su uso di energia renovabel.
E compania a bisa den 2020 cu e lo cumpli cu e necesidad masivo di electricidad usando solamente energia limpi tur dia pa aña 2030, den henter mundo. Aña pasa, segun Google a bisa, el a mira un averahe di 64 porciento energia liber di carbon pa su centronan di data y oficinanan alrededor di e globo. E compania ta usa e centronan di data, en averahe, 1.8 biaha mas eficiente cu energia compara cu otronan den e industria.
