(AP) — Un consehero legal pa corte top di Union Europeo a bisa ayera cu Google mester paga un multa enorme den un caso anti-competencia andando pa largo, den cual reguladornan a haya cu e comapnia a duna su propio recomendacionnan di compras un bentaha ilegal riba su rivalnan den resultadonan di buskeda.
Fiscal general di Corte Europeo di Husticia, Juliane Kokott a recomenda pa rechasa e apelacion di e gigante Mericano di buskeda pa e castigo di 2017. Den un opinion legal, Kokott tambe a propone pa mantene e multa di 2.4 biyon euro cu Comision Europeo, e vigilante top di competencia di e bloc di 27 nacion, a impone riba Google.
E comision a acusa e compania di dirigi bishitantenan inhustamente na su propio servicio Google Shopping, riba custia di su competidornan. Tabata un di tres multa multibiyonario cu e comision a impone riba Google den ultimo decada mientras Brussels a cuminsa aumenta su accion riba industria tecnologico.
Google a apela na e tribunal top di UE despues cu e Corte General menor a rechasa su reto. Opinionnan di fiscal general di Corte di Husticia no ta legalmente obligatorio, pero hopi biaha su huesnan ta sigui nan. Ta spera nan decision final dentro di algun luna.
“Google, manera e Comision a haya y Corte General a confirma, tabata usando su posicion dominante riba e mercado pa servicionan general di buskeda pa faborece su propio servicio di comparacion di compras door di faborece e muestra di su resultado,” Corte di Husticia a bisa den un resumen di e opinion.
“Nos ta bay revisa e opinion di fiscal general y warda e decision final di corte,” Google a bisa den un declaracion. “Irespectivamente di e apelacion, nos ta bay continua invertiendo den nos solucion, cu ta bin trahando exitosamente pa varios aña y ta bay continua traha constructivamente cu Comision Europeo.”
E comision a nenga di duna comentario.
E opinion tabata otro obstaculo e siman aki pa Google, cu tambe a bisa cu a despedi centenares di empleado den su teamnan di hardware, asistencia di voz y ingenieria como parti di medidanan pa reduci gasto.
