Reguladonan anti-confiansa pa Comision Europeo ta conduciendo un investigacion riba practica di colecta di data di Google, segun Reuters a reporta diasabra. E accion ta sugeri cu UE no ta convenci cu su multa record recien na e gigante di buskeda tabatin e efecto desea.

Un ehecutivo di Union Europeo a bisa e agencia di noticia cu ta buscando informacion riba con y pakico e compania ta colecta data. UE ta particularmente enfoca riba servicionan di buskeda local, avisonan online y web browser, entre otro asuntonan, segun un documento cu Reuters a mira.

“E Comision a manda cuestionarionan como parti di un investigacion preliminar riba practica di Google relaciona cu e colecta y uzo di data. E investigacion preliminar ta andando”, e regulado di UE a bisa Reuters.

Google a bisa cu ta continua discutiendo preocupacion pa colecta di data cu UE. “Nos ta uza data pa haci nos servicio pas util y pa mustra avisonan relevante, y nos ta duna hende e control pa maneha, elimina of transferi nan data”, un vocero di Google a bisa den un declaracion.

E investigacion ta yega mientras Google y otro gigantenan di Silicon Valley ta enfrenta cada bes mas escrutinio di oficialnan di gobierno y reguladonan na Merca. Departamento di Husticia na juli a anuncia un investigacion anti-confiansa riba e industria tecnologico mas ampliamente, enfocando riba Google, Apple, Facebook y Amazon. Mientras tanto, democratanan den congreso na juni a anuncia nan propio investigacion riba gigantenan tecnologico, cu meta pa explora si e companianan ta practicando ‘conducta anti- competitivo’.

E investigacion di UE ta yega menos di un aña despues cu e gigante di buskeda a ricibi un multa di $1.7 biyon di Comision Europeo na maart, pa su practica di aviso online ‘abusivo’. E Comision a bisa cu Google a explota su dominio door di restringi su rivalnan di pone nan avisonan di buskeda riba website di terceros.

Tabata e di tres multa di UE contra Google den tres aña, y a trece e suma total di boet na e compania na $9 biyon, despues di casi un decada di investigacion riba su practica di compras, reglanan di Android, y dominio riba aviso.