Google a move €19.9 biyon mediante un compania ‘letterbox’ Hulandes na Bermuda na 2017, como parti di un areglo pa reduci su cuenta di impuesto stranhero, segun agencia internacional di noticia Reuters a reporta.
E cifranan ta bin di documentonan entrega na Camara di Comercio di Hulanda luna pasa. E documentonan ta mustra cu e suma movi a traves di Google Netherlands Holdings BV tabata como €4 biyon mas cu na 2016 y €5 biyon mas cu na 2015.
E compania en cuestion, cu no tin empleadonan y ta basa na e districto comercial di Zuidas na Amsterdam, ta wordo uza pa move entrada di regalia gana pago di Merca na Google Ireland Holdings. Esaki ta un afiliado basa na Bermuda, unda compania no ta paga inkomstenbelasting.
E strategia di impuesto, conoci como e ‘sandwich dobel Hulandes-Irlandes’ ta legal, pero Irlanda ta purbando pa elimina e acuerdo na 2020. Google a bisa Reuters den un declaracion cu e compania ta paga ‘tur impuesto cu mester paga y ta cumpli cu tur e leynan di impuesto den cada pais unda nos ta opera rond mundo’.
Hulanda actualmente no tin impuesto riba regalia, pero tin plan pa cuminsa cambia esaki como parti di un pakete di medida pa combati evasion di impuesto den 2021.
Como 10,000 compania ‘shell’ of ‘letterbox’ ta basa na Hulanda, y ta wordo uza principalmente pa move ganashi corporativo y sconde propiedad.
Google a uza su afiliado Hulandes pa move placa desde 2004
