Durante e proximo deliberacionnan entre e partidonan politico cu eventualmente lo forma parti di e gabinete di coalicion nobo, sigur e tema di bon gobernacion, tambe den su variante di ‘Good Corporate Governance’ specificamente pa e entidadnan liga na gobernacion.
Investigacion di cumplimento di e principionan di bon gobernacion den entidadnan di sector publico y semi-publico
Riba pedido di e Comision Corporate Governance Aruba, e instituto Themis pa Gobernacion y Liderazgo a conduci un investigacion di referencia den cumplimento di e principionan basico di Gobernacion Corporativo den sector publico y semi-publico na Aruba.
E Codigo di Gobierno Corporativo di Banco Central di Aruba a wordo usa como base pa e investigacion y aunke e codigo aki ainda no ta incorpora den ley ainda, algun principio basico di Gobernacion Corporativo manera transparencia, responsabilidad y integridad, ya ta aplicable dentro di e sector publico y semi-publico.
Pa e investigacion aki e Comision di Gobierno Corporativo a selecta 42 entidad di sector publico y semi-publico. Bao di e entidadnan selecta tin, entre otro, companianan estatal, entidadnan gubernamental, fundacionnan subsidia y institucionnan educativo cu ta ricibi subsidio di pais Aruba. E investigacion tin como obhetivo pa midi di ki manera y te ki altura e principionan menciona ta parti di e procesonan den sector publico y semi-publico.
Tin diferencianan grandi den e aplicacion di e codigo dentro di e diferente entidadnan di sector publico y semi-publico, entre e directivanan y e organonan di control. Cada entidad tin espacionan den blanco, parti di e codigo cu ainda no ta implementa. Sin embargo, mas grandi e entidad, mihor e cumplimento di e codigo ta mustra di ta. Pero pa entidadnan chikito, aplicacion di e codigo ta mustra di ta un desafio importante.
Entidadnan cu ta bao di supervision externo di por ehempel Centrale Bank di Aruba, ta mustra cu e codigo aki cerca nan ta mas desaroya compara cu entidadnan caminda no tin supervision.
73.7% di e entidadnan ta indica cu e organisacion a implementa un codigo di Gobernacion Corporativo of nan ta aplica un documento similar. Un promedio di 40% di e entidadnan cu a investiga, no tin presente of no ta utilisa den nan totalidad e elementonan esencial di bon gobernacion, manera describi den e codigo. Ehempelnan di esaki ita entre otro:
– falta di reglamento;
– falta di perfil pa puesto;
– no ta documenta reuionnan den notulen;
– no tin evaluacion (periodico) di funcionario;
– falta di procedura pa nombramento di funcionario;
– no ta pone cuenta y relato anual na disposicion di publico;
– falta di un resumen di otro funcion y interes empresarial di miembronan di directiva.
Den e organonan supervisor a consta un average di 47.2% fi elementonan di e Codigo cu no ta den uso. Cerca e organonan di direccion a haya un average di 32.4% di elemento di e Codigo cu cual no tabata cumpli.
Nota di redaccion:
Te aki e resumen di e rapport interesante aki, cu ta duna un bon impresion di e trabao cu tin pa haci ainda riba e tereno aki. Principalmente e punto cu falta hopi transparencia pa cu publico en general lo mester haya atencion, ya cu esaki no ta trece gasto ni esfuerzo grandi cune, mas bien bon voluntad.
