‘Gonzalo’ lo pasa panort di Aruba na distancia basta prudente

Ayera Aruba tabatin un tempo parcialmente nubia. Segun Director interino di Meteo, David Barkmeyer, esaki no tabatin nada di haci cu Gonzalo, cu a wordo pronostica di bira e prome horcan di e temporada 2020 den Atlantico.

E tempo aki ta debi na un ola tropical, ya cu ‘Gonzalo’ ainda no a drenta den area di Caribe. E ola tropical ta permanece algun ora so. Gonzalo su presencia lo wordo spera entre mañan diadomingo den oranan di atardi pa madruga di dialuna.

Mirando cu keto bay nos cuminsa drenta den e periodo mas intenso di e temporada di horcan, pa loke ta nos region, Sr. Barkmeyer a bisa nos ta den un temporada di horca cu lo ta basta activo. Ya caba tin 8 tormenta caba pa e epoca aki cu no ta uno normal. “E ta un tiki hopi caba,” el a bisa na Bon Dia Aruba.

Gonzalo

Barkmeyer su recomendacion pa henter comunidad ta pa sigui boletin di tempo cu atencion pa tende e ultimo desaroyo di tempo cu lo por presenta.

Pa locual ta Gonzalo, e ta haya cu comunidad no mester tin temor, ya cu e no ta bay afecta Aruba directamente. E ta bay pasa pa noord di Aruba na un distancia basta prudente entre 130 pa 150 kilometer. Tambe e lo pasa basta disminui, kiermen no cu hopi forsa, el a laga sa. E lo pasa entre un tormenta tropical minimo of un depresion tropical.

Naturalmente nan lo sigui vigila di cerca e comportacion di tempo riba Atlantico. E ta spera cu niun di e sistemanan cu eventualmente lo wordo forma, no drenta area di Caribe. Manera a pasa aworaki cu Gonzalo cu ta bay drenta den Caribe.

Situacion di tempo

Durante e dianan di fin di siman loke nos por spera na Aruba ta algo di awasero debi na e ola tropical cu ta pasando. Na momento cu Gonzalo drenta area di Caribe cu ta den oranan di atardi awe, nos lo sinti’e algo di dje.

Gonzalo lo pasa parti noord di nos costa y si e fenomeno aki wanta como un ciclon tropical, e por produci algo di awasero pa Aruba, y tambe e lo por deteriora e condicion di lama tambe. Si esaki presenta manera a wordo pronostica, e lo ta laat diadomingo pa dialuna y diamars.

Mirando cu a wordo pronostica cu e temporada di horcan aki lo ta basta activo, esaki tambe ta trece cune cu nos ta acercando na e temporada di mas calor di aña. E ta entre e tres lunanan di augustus, september te cu mediado di october. Sr. Barkmeyer a sugeri pa hendenan tene cuenta cu e situacion aki. Preveniendo esaki Meteo Aruba lo bin cu un comunicado otro siman.