(CuraçaoChronicle) – Gobiernonan di Corsou y Aruba a haci un condena remarcablemente fuerte contra e rol Hulandes den e refinanciamento di e prestamo di coronavirus. Ambos isla ta sinti cu a “discrimina” contra nan pa motibo cu nan tin cu paga un interes hopi mas halto cu esun di Sint Maarten.
Den un carta na Parlamento, Gabinete di prome minister di Corsou, Gilmar Pisas ta acusa Den Haag di varios accion, incluyendo “coercion, terkedad, imposicion, abuso di poder, represalia, ‘blacklisting’, mala fe y gobernacion inapropia.” Prome Minister di Aruba, Evelyn Wever-Croes den un conferencia di prensa a referi na un “trato desigual cu no ta hustifica” y a declara cu Hulanda no ta buscando manera di asisti Aruba sino manera di “gana 300 miyon florin” for di su pais. Ademas, el a acusa cu e oficial y Parlamentarionan Hulandes deliberadamente ta plamando mal informacion tocante Aruba.
E punto di bista di e Gobiernonan na Willemstad y Oranjestad tin un contraste fuerte cu esun di Secretario di Estado encarga cu Relacionnan di Reino, Alexandra van Huffelen. Den su respuesta na e acusacionnan, el a describi esaki como “intenso” pero inhusto. El a enfatisa cu Corsou y Aruba a scoge pa rechasa e condicionnan Hulandes pa un tarifa di interes mas abao.
Na momento cu e paisnan aki cumpli cu e rekisitonan (un solucion solido pa ENNIA den caso di Corsou y keda di acuerdo cu e acta di supervision financiero den caso di Aruba), nan lo bira eligibel pa un tarifa di interes faborabel.
