Gobierno y sindicatonan ta sigui den deliberacion; Situacion actual di gobierno no ta permiti pago di indexering

Ayera diamars 3 di september, Conseho di Minister a reuni cu sindicatonan SADA, SEPPA, SIMAR y TOPA. Meta di e reunion ta pa sigui delibera cu sindicatonan riba e tema di indexering. E discusionnan ta bay riba dos aspecto. E prome ta si Gobierno por duna indexering e aña aki ainda, y e di dos ta con lo atende cu e tema di indexering den futuro.

Segun un comunicado di gobierno, pa loke ta e di dos punto, e palabracion haci cu Gobierno anterior ta cu lo institui un comision cu lo delibera riba esaki. Sindicatonan a duna nomber di esunnan cu nan ta propone pa forma parti di e comision, y Gobierno lo yama e reunion den curso di otro siman. Hunto, sindicatonan y representantenan di Gobierno lo yega na un formula pa atende cu e tema di indexering den futuro.

Pa loke ta e prome punto, lamentablemente Gobierno no por a duna un proposicion concreto ainda. Gobierno ta den proceso ainda pa cera e presupuesto di 2020, y ainda no por contesta si tin espacio financiero, ni cuanto espacio financiero tin pa paga indexering na ambtenaar. Como un bon doño di trabou, sigur Gobierno lo kier cumpli cu su trahadonan, pero e situacion financiero actual no ta permiti esey awor. Sinembargo, Gobierno ta sigui den su esfuersonan pa traha riba e situacion financiero, segun e comunicado.

Gobierno mes momento ta den deliberacion tambe cu Hulanda riba e tema di supervision, e tema di Social Crisis Plan, y pa esaki a haya te fin di e luna aki. Gobierno ta spera cu pa e tempo ey por duna un miho bista riba e tema financiero pa cu indexering.

Tambe a toca e tema di pensionadonan cu Gelijkbedrag y Bashi Premie, y aki tambe Gobierno a splica sindicato cu Gobierno ta compronde e dolor, mirando cu na 2014 e grupo aki a wordo perhudica hopi pa decision di e gobierno anterior. Aparentemente e grupo di pensionado lo bay corte otro luna, pa un hues atende cu e caso. Mientras tanto, debi na e situacion financiero dificil actual, Gobierno no por duna ningun indicacion awor mesora, pero lo sigui traha riba esaki tambe.

Gobierno ta haya importante, maske no tin un contesta concreto riba tur e preguntanan, pa sigui den deliberacion cu sindicatonan, pa hunto yega na un solucion. Hecho ta cu sindicatonan a wordo manipula pa Gobierno anterior, y awor e Gobierno actual ta buscando un solucion pa atende cu e preocupacionnan, e comunicado ta finalisa.