Mientras prome minister Mike Eman a expresa den su discurso di fin di aña cu e ta ‘orguyoso di crea un vision cu a pone e pais bek den man di pueblo’; e partido di oposicion mas grandi MEP ta uza e mesun palabra pa indica cu esey ta falta y cu ta nan kier haci ‘nos hendenan orguyoso atrobe di nos dushi Aruba’, den su mensahe p’e aña nobo.

Prome minister Eman ta enfatisa den su discurso e situacion cu su gabinete a haya momento di wordo eligi na 2009 unda Aruba segun e tabata den un crisis severo. Pero awor e situacion a cambia asina cu el a expresa ‘un orguyo grandi di e maneho hiba pasobra esaki a pone cu cada ciudadano tabatin e sentimento cu cada un di nan y nan bario ta conta. Pues un vision cu a cana hunto pa logra e meta final na bienestar di e pueblo’.

E ta bisa si cu e trabou ainda no ta cla, pero cu hopi ya a wordo realisa. Den su discurso di fin di aña e tambe ta toca e tema di sostenibilidad como ‘e liña cora’ cu ta core den tur proyecto di su gabinete. E ta menciona e transicion andando na Aruba pa energia duradero manera di solar y biento, haciendo Aruba ‘como pais orguyoso ta e prome den mundo pa alcansa e capacidad 100% den produccion di energia duradero’. Mester menciona si cu esaki ta e vision pa 2020, pero awor na 2017 e capacidad a yega mas o menos 50%, locual gobierno mes a admiti aña pasa. Como cu e meta di 100% ta mas dificil pa yega, asina prome minister Mike Eman a indica na 2016.

Oposicion uzando e mesun palabra
Analisando e relato di MEP unda ta duna un mensahe pa 2017, e ta remarcabel cu e partido di oposicion tambe ta uza e palabra ‘orguyoso’ como punto central. Pero den sentido cu nan ta haya cu e 7 aña di maneho di gabinete Eman a haci net e contrario. Pa motibo di esey e partido a bin cu tres punto pa asina haci e ‘Arubano orguyoso atrobe di nos pais’. E tres puntonan ta cu nan kier cambio di ley pa asina percura un gobernacion mas integro. E otro punto principal ta duna mas prioridad na e proteccion y siguridad di e ciudadano. Entre otro combati abuso sexual di mucha, hiba e cuida mas cerca di e ciudadano, elimina listanan di espera, etc. E di tres punto ta desaroyo economico, crea mas cupo di trabou y baha e debe nacional.

Un punto remarcabel den nan proposicion tambe ta cu MEP kier baha e edad di pensioen pa asina crea mas cupo di trabou pa hoben. Esaki ta interesante mirando e desaroyo cu tin mas y mas hende di edad halto na Aruba y menos hoben, cu ta laga e pregunta: con ta haci e ora cu nos gastonan social y productividad.