Pa algun motibo nos ta cuminza haya e impresion cu tin tempo politico bastante cayente na caminda. A tuma nota por ehemplo di e conflictonan den e partido democrata cristian den oposicion. Aparentemente, di un banda tin e diferencianan di opinion entre e parti hoben den e partido, contra e ‘veteranonan’ bao oliderazgo di e anterior ministro presidente. Banda di esey tin e asunto di e apoyo practicamente incondicional te awor aki na e parlamentario bao sospecho di corupcion den e caso mas grandi di corupcion cu Aruba a conoce. Naturalmente ta contesta tur pregunta o comentario riba esaki cu e conocido frase di ‘cada persona ta inocente te dia nan keda condena’ pero e dia ey ta yegando rapidamente y como politico individual y como colectivo lo mester bin un posicion mas sensato y realistico. Ta keda un problema cu no ta atende e asunto, no ta mustra tanto na e base electoral y publico en general cu ta poniendo orden den cas, cu e partido ta tuma despedida di e epoca scur ey cu a conduci na e serie mas extenso di investigacion hudicial contra mandatario, pa cual ya tin un politico di e partido cera pa varios aña, y tin mas pa sigui.

Ta mas cu claro cu como observador nos por comenta cu e partido lo yuda su mes cu un proceso adecua di renobacion interno, unda introduccion di cara nobo ta primordial, pero e ta keda un asunto di voluntad propio of no; e consecuencianan electoral lo varia segun cu ta haci esaki o ta opta pa sigui cu e partido ‘as is’. Ta na e miembronan pa sa kico cu nan ta haci cu nan partido. Consecuencia por ta si cu e partido lo mustra debil pa e siguiente campaña electoral, haciendo en principio bida di e actual coalicion mas facil.

Di otro banda, e coalicion ta mustra bon den cierto aspecto y den otro menos. Economicamente e pais ta bayendo bon, a pesar cu esey no ta conta pa tur ciudadano o hogar, y ta di comprende cu gobierno lo trata di cosecha apoyo pa esaki. Sin embargo, tin algun asunto cu por bay cambia e panorama aki. Nos ta cuminza ripara e promer diferencianan entre e partnernan di coalicion. Asina tin e asunto di e ley pa permiti matrimonio di mesun sexo, di cual e partido ‘junior’ den e coalicion ta spera cu esey proximamente lo bay parlamento. Nos ta keda duda di esey, pasobra tratamento, y mas ainda su aprobacion den parlamento, lo haci e casacion na Hoge Raad contra e recien sentencia di Hof bira obsoleto, cu cual e partido grandi ta perde e ‘time out’ pa mantene e parti mas conservador di nan base tranquil pa sigur dos aña. E confrontacion den e asunto aki por conduci na un situacion unda e partido junior mester bay reflexiona hopi bon con nan ta evita e mesun ruta di fracaso cu tanto partido chikito a cana den pasado.

Ademas, poco poco e partido menor lo ta ripara cu e rapidez di formacion di gobierno a ‘deal’ nan un man di carta (ministerio) cu no tin ningun peso den e actual coalicion. Ta ripara den e dianan aki cu e asunto di prijs di coriente a conduci na un maneho divergente entre e mandatario cu ta sinta na mesa cu e companianan di utilidad, y e ministro encarga cu asunto economico cu ta eherciendo su responsabilidad pa loke ta e consesion di NV Elmar. E resultado lo ta conoci pronto: e compania lo probablemente ignora e ministro ultimo menciona aki. Ta remarcable tambe cu recientemente e mesun mandatario di e partido a declara cu den conseho di ministro, den e caso di matrimonio di mesun sexo, nan ta solamente ‘un minoria’. Straño, pasobra pa varios decada tabata hustamente e partidonan chikito den coalicion cu por a logra impone, pasobra e partner grandi no gusta laga gobierno cay na momento menos conveniente. E debaclenan sufri na dos ocasion grandi caba, e caso di e contrato di LNG y e caso di e ley di matrimonio ya menciona, ta haci cu dificilmente por sigui guli derota, cu vista riba e apoyo electoral na 2025.

Tur esaki no kier bisa cu tur cos ta bay ‘viento en popa’ pa e partido grandi den gobierno. A pesar di a logra hunto cu e otro islanan kita e COHO for di mesa, e acuerdonan cu Hulanda, cu e repago di e debe di 915 miyon florin como ‘stok achter de deur’, a keda mescos. Fuera di e acuerdo tocante con ta bay paga e debe, poni pa october di e aña aki, tur medida impopular ta bin cay riba e coalicion, pero principalmente riba cuenta di esun cu ta mustra triunfante actualmente. Y particularmente e afan pa no duna claridad riba varios asunto importante lo bay duna protesta. Por ehemplo: nos ta drentando april y ainda no tin nada conoci di e imposicion di BBO riba importacion. Gobierno a anuncia cu lo bay aplica restitucion di e impuesto paga ey, pero detaye no ta conoci. E posibilidad di restitucion pa e empresa importador no lo kita cierto inflacion cu lo surgi den e prijsnan final cu e consumidor lo bay paga. Realmente ta inaceptable cu ta tarda tanto pa anuncia y duna informacion adecua di e medida aki. Y asina tin hopi mas tema pa atende den cual e partido menciona lo mester carga practicamente tur critica. Caminda pa eleccion 2025 ta mustra largo ainda.