Durante conferencia di prensa di gobierno ayera tardi, Minister di Husticia y Asuntonan Social, Rocco Tjon, hunto cu director di Elmar NV, Anthony Irausquin, a firma un convenio pa loke ta trata e instalacion di 40 camara di seguridad rond di Aruba den cuadro di e proyecto di camara di seguridad di Ministerio di Husticia.

Minister Tjon a splica cu conforme e plan di maneho di Ministerio di Husticia y Asuntonan Social, e ta un enfoke pa inverti den tecnologia y innovacion y den cuadro cu esaki, entre otro, a inverti for di aña pasa caba den e proyecto di camara.

Di e proyecto aki tin diferente fase cu a wordo aproba y manera por a tuma nota ya caba henter e area di hotel, tanto na banda di lama como tambe den e asina yama ‘hot zone’, ta ekipa cu camara. A aproba tambe e siguiente fase pa loke ta trata e centro di ciudad di San Nicolas y manera gobierno a anuncia algun luna atras caba, despues di evalua e proyecto piloto di camara di seguridad durante temporada di carnaval cu tur stakeholders, e minister ta indica cu tur partner den e proyecto tabata positivo pa cu esaki y pa e motibo ey a pasa over na firma un convenio cu Elmar N.V. pa e di tres fase di e proyecto.

E di tres fase aki ta consisti di cuarenta localidad strategico rond di Aruba cu ta bay wordo ekipa cu camara di seguridad pa di e forma ey amplia seguridad y yuda combati criminalidad.

Minister Tjon a sigui splica cu e proceso pa scoge e localidadnan aki tabata den man di un grupo di trabou di Cuerpo Policial di Aruba hunto cu un grupo di trabou di Elmar N.V. cu a percura pa scoge e luganan strategico teniendo na cuenta e informacion cu KPA ta dispone di dje, entre otro cifranan, pa asina e camaranan wordo instala na puntonan cu ta bay ta di balor agrega pa asina combati criminalidad di un miho forma.

Pa esaki tambe, Minister a agrega cu a tene cuenta cu e zonanan na Aruba cu tin establecimento nocturno pa garantisa seguridad den e areanan aki y a tene cuenta cu tur e rotondenan na Aruba, pasobra el a indica cu por ehempel na momento cu un incidente tuma luga tin cierto rutanan cu e delincuentenan ta tuma frecuentemente, y esaki por yuda polis combati criminalidad tambe.

Minister Tjon a informa cu durante e dos simannan cu ta bin, tur e borchinan cu ta indica cu tin camara di seguridad ta bay wordo poni na e localidadnan concerni—esaki conforme ley—y pa comunidad tambe ta na altura di cual ta e zonanan cu ta bay tin camara di seguridad.

“Ya caba nos ta wak e frutanan di diferente fasenan di e proyecto di camara. Dos siman pasa mi tabata den parlamento y mi a ricibi e pregunta pa loke ta cifra di criminalidad y nos por a presenta na parlamento un reduccion drastico pa loke ta trata e cifranan di criminalidad,” el a remarca.

Cu e inicio di e fase nobo aki di e proyecto di camara, el a agrega, ta cuminsa tambe cu e construccion di e Operation Command Center na Savaneta, na e edificio di ex hulp bestuurskantoor, cu ta un proyecto cu ta wordo ehecuta conhuntamente cu Setar N.V.

E mandatario a subraya cu ta importante en berdad pa inverti den tecnologia, pero na mesun momento mester tene cuenta cu e factor humano pasobra na final di dia tur e imagennan cu ta bay wordo compila mester ser analisa y comparti cu e diferente departamentonan hudicial teniendo na cuenta tur e reglanan y rekisitonan pa esaki.

E Operation Command Center ta bay ta un edificio na unda ta bay ubica personal di diferente departamento pa percura cu e esaki ta funciona 24 ora pa dia.

Pa loke ta e aspecto tecnico, Elmar N.V. tin na su encargo tur loke ta cay bao di e proceso aki. Director di Elmar N.V., Anthony Irausquin, a splica cu esaki ta un prome paso y manera indica caba ta cuminsa e fase di e proyecto aki cu instalacion di 40 camara.

Irausquin e recorda cu na principio di aña, Elmar, inesperadamente, mester a instala 35 camara di seguridad durante e bishita real y esaki, el a remarca, tabata un gran manera di cuminsa como proyecto piloto, durante cual nan a logra instala 35 camara den menos di tres dia di tempo.

Pa loke ta Elmar mes, el a splica cu nan a cuminsa algun aña atras caba cu e proyecto ‘smart grid’ cu e vision pa un dia yega na e camaranan aki. E prome parti tabata e parti di smart meters cu a wordo acopla ariba e smart grid y aworaki a yega turno pa instala camara rond di Aruba.

“E ta un grid cu nos kier bay over na un smart city eigenlijk y bo ta wak cu den menos di 10 minuut di tempo nos ta instala un camara y baha bek for di truck y sigui pa e siguiente. Esaki ta bisa tambe con exitoso e camaranan aki ta y nos por move y adapta hopi lihe ariba peticion di KPA,” el a indica.

Irausquin a splica tambe cu na momento cu tin algun actividad grandi y KPA haci peticion pa pone camara extra of camara na algun otro luga strategico, cu e sistema aki ta facil pa adapta, instala e camara y haci e cambionan necesario.

Durante temporada di carnaval, a instala tambe algun camara riba diferente ruta di carnaval pa asina haci un prueba di e proyecto aki, y e tempo ey a informa cu e camaranan aki ta instala temporalmente y despues ta wordo kita. Irausquin a confirma cu nan ta bay instala e camaranan aki na e 40 localidadnan nobo den e fase nobo di e proyecto di camara di seguridad.

Por ultimo, Minister Tjon a enfatisa cu e parti di mantencion di e camaranan di seguridad ta inclui den e proyecto, pues ta den presupuesto y ta tene cuenta cune pa asina garantisa cu e tipo di proyectonan aki ta duradero na unda no lo tin camaranan cu lo cay afo pa falta di mantencion.