Cu decision di e 4 miembronan di directiva di Fundacion Parkenan Nacional Aruba (Parke Arikok) pa tuma nan retiro en bloc, NGO Aruba Birdlife Conservation conforme statutonan di e fundacion a bay pidi hues pa nombra directiva nobo. Mientrastanto minister di medio ambiente ta reacciona expresando cu tin foul play tumando luga di parti di e directiva.

Despues di e polemica cu a observa algun luna atras ora trahadonan di parke Arikok a acudi na minister pa drecha nan malcontento cu e manera di opera di e directiva di e parke, reunionnan intensivo a cuminsa pa wak di ki manera por yega na un acuerdo entre e dos partidonan.

Segun minister Otmar Oduber (POR), e directiva di e parke lo a cambia nan statutonan pa amplia nan tareanan como fundacion encarga cu conservacion di areanan protegi, cual e minister no ta haya ta corecto. Ademas e minister a menciona cu e manera cu e directiva no a pone parlamento ni gobierno na altura di esaki a contribui na e situacion unda no ta confia den e directiva.

Cambiamento di statuto
Sinembargo, den un nota manda pa instancianan gubernamental, trahadonan y prensa data 18 di juni, e directiva di e parke a trece dilanti cu nan a cana un proceso largo desde 2016 pa por cambia e statutonan pa asina por cuminsa adkiri terenonan priva rond di e fronteranan di e parke conforme e ordenansa nacional riba proteccion di naturalesa y rekisitonan internacional ora a obtene fondonan di desaroyo di Union Europeo pa desaroya infrastructura di e parke. E proceso aki segun e directiva a bay conhuntamente cu departamento huridico Directie Wetgeving en Juridische Zaken y tambe nan a publica esaki debidamente den landscourant.

‘Nan no a pone cu nan ta traspasa e tereno cu nan ta adkiri’
E meta di esaki ta pa maneha un constelacion di areanan protegi na Aruba, mescos cu na Merca e servicio di parkenan nacional ta adkiri terenonan rond di nan areanan conserva pa pasa esaki na nomber di e pais. Pero segun e minister, ‘nan a lubida e detaye chikito ey’. “B’a cambia statuut pa bo cumpr’e, pero bo no a bisa cu bo ta traspas’e pa pais Aruba pa 1 florin. E detaye chikito ey. Anto e ora ey abo mañan tin poder riba e parke cu bo no ta dicidi riba e pida cu b’a cumpra ey so, si no cu bo ta dicidi riba tur loke ta rond di dje tambe.”

Sindicato
Ademas e directiva ta trece dilanti cu e minister en cuestion lo tin interesnan pa haya mas influencia dentro di e directiva di e parke cual ta consisti di un parti di organisacionnan no gubernamental y gubernamental simetrico. Esaki nan a ilustra den e manera cu trahadonan di sindicato TOPA a acerca minister, en bes di tene consideracion cu e sindicato mayoritario pa empleadonan di e parke, esta SEPPA.

Reaccionando riba esaki sr. Oduber a bisa cu ‘mi no a papia cu sindicato. Mi a papia cu trahado. Aki mi tin un carta firma pa 43 trahado di e 48 en total’. “Por cierto nan tambe a purba reuni cu trahado. Pero nan a keda cu dos hende sinta den un reunion cu nan a yama. Pasobra tur trahado a lanta bay y bisa cu nan no tin confiansa den bestuur.”

Discusion ameno entre partidonan
E minister ta trece dilanti alabes cu pa basta tempo tin charlanan ta andando cu e directiva di e parke cu tabata bayendo den esfera ameno pero cu pa via e cambiamento di statutonan a kita e confiansa. Ademas, segun sr. Oduber ‘di un dia pa otro nan ta bisa cu nan ta tuma retiro mientras un miembro di directiva e mainta prome a manda mi un email bisando cu notario ta riba vakantie pero e concept t’ey pa y cu ta dura un siman mas’.

Pues segun minister te hasta tabatin compromisonan di parti di e directiva mes pa minister nombra un directiva nobo.

“Loke esaki ta ta un coup. Anto bo sa kico ta peligroso? Un coup unda nan kier gara 20% di bo teritorio. Pasobra si esey tuma luga no ta bay tin niun gobierno cu ta bay por drey bek loke nan a haci.”

Minister a trece dilanti cu e ta haya prioridad, pensamento cual e directiva cu a tuma su retiro tambe a comparti, pa crea un structura 2-tier unda tin un board cu ta supervisa e trabou di e directiva, asina cumpliendo cu e normanan di Good Corporate Governance.

Carta di DCNA
Durante e conferencia di prensa minister a menciona cu te hasta posibelmente e carta cu organisacion DCNA a manda pa minister lo ta concipia pa e mesun miembro di directiva cu ta den Parke Nacional Arikok y alabes den DCNA (Dutch Caribbean Nature Alliance). Alabes e minister remarca durante e conferencia cu e propio miembro aki su NGO Aruba Birdlife ta esun cu lo a skirbi e carta pa pidi hues pa nombra miembronan di directiva nobo.

Nos a tuma contacto cu presidente di ABC Greg Peterson kende a abstene di duna comentario mas estrecho cu ‘por fabor tuma contacto cu DCNA sea por medio di sr. van Driel cual ta e presidente. Mirando cu DCNA ta cay bou proteccion di Princes Beatrix podise por pidi Princes Beatrix su opinion’.

Gobierno a entrega ayera un peticion na corte pa asina por nombra un directiva interino mirando e ausencia di e directiva cu a tuma su retiro, pa asina percura pa e parke no bay plat. Esaki ta sigui e peticion di ABC na hues pa nombra un directiva nobo e dia prome, esta 19 di juni. Awe tardi tin un caso na corte pendiente riba esaki. Nos lo sigui e desaroyo di e caso di cerca.