Durante un conferencia di prensa ayera tardi, minister di Transport, Integridad, Naturalesa y Asunto di Adultonan Mayor, Ursell Arends, a anuncia e lansamento di e estudio Circular Assessment Protocol (CAP), un estudio cu ta bay enfoca den e maneho di desperdicio basa riba principionan di economia circular.
Minister Arends a splica cu conhuntamente cu Impact Blue Foundation y Circularity Informatics Lab na University of Georgia, ministerio di Naturalesa ta lansa e estudio aki cu e meta pa transforma e sistema di maneho di desperdicio den un sistema solido, integra y sostenibel basa riba e principionan di economia circular, unda cada ciudadano ta contribui pa mantene Aruba limpi y na e conservacion, rehabilitacion y restauracion di e naturalesa.
El a sigui splica cu como parti e prome fase ta dirigi tur fluho di desperdicio for di e tereno di dump na Parkietenbos, stimula e habitonan di separacion di desperdicio den comunidad a traves di e campaña Baki den Bario, cual a cuminsa aña pasa y ta continua den aña 2024 tambe.
E mandatario a indica cu aworaki nan ta den e proceso pa completa e tapamento di e tereno di dump di Parkietenbos y mientras tanto, el a agrega, esaki tambe lo sucede den diferente paso prome cu finalisa e proyecto aki.
Na momento cu esaki keda cla ta pasa over na fase dos, cual el a señala, ta e restructuracion di e sistema di desperdicio di Aruba. El a splica cu como parti di fase dos, e meta ta pa diseña y implementa e instrumento politico adecua pa acelera e circularidad den comunidad, pero pa logra esaki, tin mester di datonan.
Minister Arends a indica cu tin hopi rapport ariba e topico aki, sinembargo, el a remarca, tur estudio realisa den pasado a enfoca solamente ariba e perspectiva di fin di bida di un obheto, ora cu ya ta bira desperdicio.
El a señala cu pa por compronde e sistema di desperdicio di Aruba completo, mester di diferente tipo di datonan, y no solamente pa compronde kico ta sucede na momento ora cu nos tin necesidad mas pa un producto.
Taylor Maddalene, director di e Circularity Assessment Protocol na Circularity Informatics Lab na University of Georgia a elabora ariba e estudio cu nan ta bay realisa na Aruba conhuntamente cu Impact Blue Foundation y ministerio di Naturalesa.
Maddalene a splica cu e Circularity Informatics Lab ta traha riba e interseccion di materialnan, maneho, prevencion di contaminacion y resiliencia di comunidad. Nan ta enfoca ariba un sistema holistico pa crea un economia circular cu un enfoke particular riba nivel local. Nan ta investiga e cantidad, fuentenan y distribucion di contaminacion di plastic y otro fluho di desperdicio den tur parti di mundo.
El a sigui splica cu nan a desaroya e estudio CAP como un metodologia standarisa pa pone un punto di salida, identifica oportunidadnan pa optimisa circularidad y empodera comunidadnan local pa tuma accion basa riba kico lo traha miho den e contexto local.
El menciona cu nan ta haci uso di e aplicacion Marine Debris Tracker pa sigui e aspecto di desperdicio riba nan investigacion y esaki ta habri pa cualkier persona na mundo usa. “Mi ta kere nos tin datonan di desperdicio di tur continente di mundo y aworaki nos ta hopi entusiasma pa agrega Aruba na e lista,” el a indica.
Te awe, Maddalene a remarca, Circularity Informatics Lab a conduci mas cu 50 estudio CAP na 16 diferente pais y nan ta traha cu partnernan local. Na Aruba, nan lo traha cu Impact Blue Foundation coml nan partner di implementacion local. Hunto nan lo ta traha riba e analisis di trabao riba e veld mes y tambe e rapport mes.
Maddalene a reconoce tambe algun progreso reciente cu a tuma luga na Aruba pa den loke ta trata reduccion di desperdicio, desviacion y circularidad. “Nos ta sinti nos honra pa ta parti di e momentum continuo aki y pa yuda informa algun di e siguiente stapnan,” el a bisa.
El a splica cu e estudio CAP na Aruba lo bay mas leu cu nan modelo standard y en realidad lo wak tur fluho di desperdicio municipal cu un enfoke clave riba materialnan cu por wordo reusa, manera plastic, metal y glas, igualmente cu desperdicio organico biodegradable, materialnan di construccion y tambe desperdicio electronico.
“E CAP mes ta un enfoke di metodonan mescla cu ta wak circularidad a traves di shete componente for di e entrada di materialnan te na e perspectiva y percepcionnan di comunidad, diseño di producto, oportunidadnan di uso unico contra reuso y maneho di desperdicio, y finalmente, ultimo, fuga di desperdicio den ambiente,” el a subraya.
Impact Blue Foundation tambe lo ta formando parti den e ehecucion di e estudio CAP. Sr. Roland van Tricht, presidente di Impact Blue Foundation a splica cu Impact Blue ta un fundacion cu a wordo estableci na 2018 y tin como mision sostene y mehora e calidad di bida pa preveni contaminacion, specificamente cu un enfoke riba plastic na comienso.
El a indica cu e fundacion funciona manera un brug entre e sector publico y priva pa diseña y implementa politicanan pa logra su mision.
Van Tricht a sigui splica cu Impact Blue a traha riba tur dos ley di uso di plastic na Aruba, manera tambe a yuda cu esun di Sint Maarten. E fundacion a conduci a participa den tres estudio cientifico tocante e tema di plastic y contaminacion y a comparti nan experticio pa reduccion significante di desperdicio solido municipal.
“Te awe, hunto cu e leynan cu a wordo implementa pa gobierno, nos a preveni hunto casi 160 miyon di saco di plastic di un solo uso di drenta den nos ambiente y lama,” el a remarca.
