Gobierno trahando concepto di ley pa mehora posicion di miembronan di Arumil

Ayera mainta durante conferencia di prensa minister di Husticia y Asuntonan Social, Rocco Tjon, a anuncia un aumento den e pago di bijstand pa hende cu limitacion, y a alabes a elabora ariba proceso di profesionalisacion di Arumil.

Minister Tjon a splica cu den historia di bijstand pa personanan cu limitacion, apenas na tres ocasion so esaki a conoce un aumento; e prome tabata na 2004, e siguiente tabata na 2007 y e ultimo tabata 11 aña pasa na 2013.

E mandatario a anuncia cu oficialmente for di 1 di juli 2024 personanan cu ta ricibi e bijstand aki lo conoce un aumento di 130 florin pa luna. E suma total nobo ta bay bira 1080 florin pa luna. E suma nobo ta wordo paga den e bijstand di luna di september cu forsa retroactivo te cu juli 2024.

Durante conferencia e minister a elabora tambe tocante e profesionalisacion di Arumil. El a splica cu e proceso pa sigui profesionalisa Arumil ya caba ta andando pa algun aña. E meta di e proceso aki ta pa yega na un concepto di ley nobo pa no mester usa e dienstplichtverordening como base mirando cu esaki ta un ley bieu. A base di un landsverordening y landsbesluit nobo lo regla y mehora e posicion di Arumil.

E proceso aki ta bay den cooperacion cu diferente departamento na Aruba, manera entre otro DRH y Directie Wetgeving, pero tambe cu departamentonan na Corsou y Hulanda.

Minister Tjon a indica cu siman pasa el a reuni cu e director di Asuntonan Huridico di ministerio di Defensa na Hulanda, hunto cu e brigada general di ministerio di Defensa y cu e hefe maximo di Guarda Costa, cu den caso aki tambe ta hefe di Arumil y tambe Curmil.

Durante e reunion e mandatario y e ehecutivonan a repasa e pasonan cu a wordo tuma. Na 2022 y 2023 ya caba tin cierto concepto di ley cu a wordo traha, e vision y direccion strategico unda Aruba kier bay cu Arumil a wordo defini y e trayectonan pa logra esaki tambe a wordo defini y tin conceptonan cla.

El a indica cu aworaki tin un timeline defini tambe caminda na november di e aña aki e version final di e conceptonan di ley aki lo ta cla pa Directie Wetgeving por tira bista riba nan.

E mandatario a resalta cu e intencion ta pa na comienso di 2025 inicia cu e trayecto di ley cu anticipacion cu pa dia 1 di januari 2026 e leynan aki lo drenta na vigor.

Pa e miembronan di Arumil esaki ta bay nifica un cambio grandi den nan posicion, el a remarca. El a sigui splica cu nan lo wordo apunta como ambtenaar y cu e obhetivo cu despues cu nan a caba di sirbi na Arumil, nan por transferi den e cadena hudicial di e pais.

Minister Tjon a resalta cu den esaki e participacion di DRH tabata importante pa defini e diferente trayectonan cu ta bay bin pasobra e transferencia pa cuerpo policial lo ta diferente cu e transferencia pa por ehemplo Guarda Nos Costa of KIA pasobra ta trayectonan diferente.

El a agrega cu a trece dilanti tambe cu ya caba aworaki, anticipando cu na 2026 esaki ta bin na vigor, ta bay haci un analisis di cuanto miembro di Arumil lo mester sali for di servicio pa comienso di 2026 pa di aworaki caba e miembronan aki por cuminsa e trayecto pa prepara nan pa nan por drenta den e cadena hudicial.

El a enfatisa cu ya caba den e diferente reorganisacionnan cu ta andando ta teniendo cuenta cu e hecho cu e miembronan cu finalisa nan trayecto den Arumil por drenta e organisacionnan hudicial na algun departamento specifico.

Un punto importante pa esaki por bira realidad, el a señala, ta cu e training lo mester cuminsa na tempo y pa esaki Hulanda a indica cu nan ta dispuesto pa pone e fondonan aki disponibel pa por guia e miembronan di Arumil.

Den pasado ta conoci cu pa por drenta entre otro Cuerpo Policial of Guarda Nos Costa, tin un lista di rekisito y exigencianan cu mester cumpli cune. Miembro di prensa a puntra e mandatario si den e caso aki, e exigencianan aki ta keda na luga of si ta ignora nan den e caso specifico aki.

Minister Tjon a indica cu tur e exigencianan ta keda na luga, pero e punto cardinal di kico a cambia aworaki pa cu pasado ta e punto di salida. El a splica cu e prome punto ta gobierno, aworaki gobierno ta habri pa e personanan aki haya un oportunidad pa traha den e cadena hudicial. Ademas di gobierno, el a menciona cu Korpchef actual y alto mando di Kazerne tambe ta habri pa e esaki.

El a remarca cu unabes tur tin e mesun punto di salida, ta posibel pa analisa tur aspecto mucho miho. E mandatario a subraya cu e personal den Arumil ta personal cu ta ricibi hopi bon training cu ta duna nan conocemento y experiencia valioso cu nan no por simplemente laga bay perdi.

“Nan tin docente di sport, docente di tiro, nan tin tambe curso avansa pa loke ta e parti di vigilancia y seguridad, dus mi ta kere e ta experticio cu bo por haci bon uso di dje den e cuerponan di husticia. Ta conocemento y experiencia cu no por laga bay perdi. Nos por haci mucho mas uso di e conocemento y experticio aki bou di e cadena hudicial. P’esey un paso importante ta pa DRH tambe ta envolvi pa na tempo por defini e trayectonan pa cu e Arumillers aki,” el a enfatisa.

Otro miembro di prensa a puntra e mandatario si apuntando e miembronan di Arumil como ambtenaar no ta bira un peso pa gobierno.

Minister Tjon a indica den su contesta cu si, pero e ta un paso importante pasobra asina ta garantisa e transferencia pa e personanan aki, cual el a señala ta un desaroyo positivo.

“Esey ta e intencion y tur cos mester wordo cristalisa, pero unabes nan ta ambtenaar, e transferencia pa nan drenta e cadena hudicial ta mucho mas facil y na final di dia e ta scapa bo hopi si pasobra bo tin personanan hopi experiencia, cu hopi conocemento caba pasobra nan ta sigui diferente curso caba den Kazerne cu nan por instala nan mes mesora den cierto departamentonan pa por yuda e cadena hudicial,” el a remarca.