Algun luna pasa Minister Angel Bermudez a trece pa dilanti cu ta analisando e diferente aspecto riba importacion di autonan cu ta stuur na man drechi (RHD). A bini cu diferente motibonan pakico mester para e importacion di e vehiculonan aki pero keto bay ainda tin container di nan ta drenta y nada no a cambia.

“Tin algun argumento pakico eigenlijk nos mester prohibi e importacion aki y mi ta trahando hunto cu colega di Husticia pa realisa e cambionan aki,” Minister Bermudez ta bisa. E mandatario a enfatisa riba e punto cu el a yega di trece pa dilanti caba; cu contribucion di polucion di e autonan aki ta mucho grandi, nan ta auto bieu cu partinan dificil pa haya cual bo no ta haya tampoco na dealer local. El a subraya tambe cu: “E autonan aki ta participa den un trafico cu ta contrario di nos, pues nan luznan ta otro cu di esunnan cu ta core den e sistema di nos trafico. E motibonan aki ta pone eigenlijk cu mi ta kere nos mester bay frena henter e importacion aki pa asina ey contribui na e siguridad di nos trafico.”

Medio ambiente
E mandatario ta bisa cu hunto cu ministerio di Husticia, mester ainda wak kico ta e argumentacion completo, pa manera cu el a describi: “stop e cadaver bieunan ki cu ta wordo saca di otro caminda pa via cu nan no kier nan mas den nan trafico, cu nos ta introduci nan akinan den nos trafico.” Pa locual ta trata e leynan cu mester wordo adapta, segun e mandatario, su coleganan di medio ambiente ta trahando riba reglanan pa loke ta trata henter e topico ey, pero no a indica con largo esaki por tuma. Te ainda, no tin reglanan cu ta midi tur esaki anto keto bay tin otro vehiculonan cu ta wordo importa – como tambe e tipo di barconan cu ta para na nos wafnan -cu ta contribui masha hopi na polucion tambe.

Fundacion RHD Community Aruba
RHD Community Aruba – e fundacion cu ta para pa derechonan di esunnan cu ta conduci e vehiculonan cu stuur na man drechi – a duna nan reaccion algun luna atras riba e diferente puntonan aki.
Nan a yega di trece pa dilanti na minister president mes tambe cu ta papiando aki di mas cu 8 mil famia cu a sinti un alivio den nan cartera. E fundacion a abstene di duna nos comentario y recorda nos cu ya caba a pone bon cla cu si gobierno dicidi di pusha algo cu ta bay contra leynan internacional/tratadonan di Europa, cu por topa nan den corte. Nan ta laga sa di a entrega tur documento necesario na gobierno caba.

Nos a puntra Minister Bermudez su reaccion riba esaki, kende ta bisa nos cu e no tabata sa di e fundacion aki, pero: “Mi ta imagina mi cu nan kier proteha nan hobby, beneficionan y ideanan. Mi ta kere cu si acaso, ora yega asina leu cu nan ta haya cu nan no kier bay di acuerdo cu e cambionan, en berdad corte ta unda bo mester acudi ora bo no ta hayando un trato igual.”