Gobierno tin pensamentonan Green pero en realidad ta haci otro

Awe a tuma luga e apertura di e 7 edicion di e Green Conference na Aruba cu e  meta pa promove Aruba su actividadnan sostenibel pa cu “Green”. E idea original tabata cu Aruba mester ta na prome luga, cu lo tabata 100% depediente di energia sostenibel, pero te ainda nos ta leu di logra e meta aki.

Pero di otro banda loke ta resulta preocupante y contradictorio cu e filosofia “Green” cu gobierno ta promove como parti di su maneho y compromiso mundial ta cu den realidad Aruba mes ta rondona cu problemanan grandi cu nos medio ambiente. Dos ehempel di esakinan ta e Dump na Parkietenbos (prikibos) y e Refineria. Habitantenan di e barionan aki ta sclama pa Gobierno tuma accion y resolve e problemanan ey, pero nada ainda. Ningun solucion concreto y definitivo.

Humanan toxico, daño na medio ambiente, tratamento cu asbest y un Dump sin control ta djis algun punto cu e habitantenan di e barionan aki ta urgi pa Gobierno resolve. Medionan Social (facebook y websites) den e dianan aki ta yena cu imagennan cu ta contradeci e pensamento y maneho Green cu Gobierno ta propagando. E tristo, segun algun di e habitantenan cu Bon Dia Aruba a yega di papia cu nan ta, cu e candelanan toxico riba Dump a paga pa algun aña atras caba, pero pa capricho politico, mester a para un proyecto y e resultadonan ya caba ta conoci.

San Nicolas di otro banda tabata anhela un era nobo pa cu e refineria. Segun Prome Minister, aki tambe lo a aplica e pensamento Green. Lastimamente nos por wak, manera Bon Dia Aruba a yega di informa – cu tin problemanan den e area cu asbest cu ta wordo gedump riba tereno di e refeneria. Nos por conclui Gobierno tin pensamentonan Green, pero den e realidad e ta haci otro.

P’esey straño ta cu esnan cu mester salvaguardia nos salud ta bisa den nos edicion di ayera cu na Dump no tin problema. Falta di material di e departamento ta haci cu nan no por conseha Minister di Salud riba e problema aki.

E politica di avestruz ta locual ta realmente e problema. Ta admiti cu tin problema cu e Dump, pero cada biaha ta sconde tras di falta di material, leynan anticua of Serlimar pa haci cu no por resolve e problema awor.

Mirando tur esaki kisas e Green Conference ta bon pa Aruba su imagen green, pero e realidad pa Habitantenan di Parkietenbos y San Nicolas ta otro.