Gobierno tin mas dolor… Cu ley di supervision…?

Mientras atencion ta bay mas tanto na e pregunta clave si gobierno ta acepta e ley di Reino pa supervision financiero si of no, lo por tin mas motibo pa no ta contento cu e ley aki (RAft). Den e ley a inclui e norma pa gasto di personal di 10% di GDP (nominal), cu mester alcanza pa mas tarda pa 31 di december 2027. Esaki ta e norma manera IMF ta maneha den caso di pais manera di nos, y por cierto na 2018 IMF a haci un analisis pa gobierno di Aruba pa loke ta e tema aki.

E bentaha di usa e norma di IMF ta cu esaki ta referi na e gastonan manera e instancia ta defini esakinan. Nan ta hopi mas amplio si cu e lista parcial di empleado publico, solamente gasto di e ministerionan, cu a sirbi como base pa e protocol firma cu Hulanda na november 2018, cu tabata vigente – ainda – pa presupuesto 2023: un suma di Afl. 460 miyon. E inventarisacion di IMF menciona a yega na un suma di Afl. 645 miyon, sin conta aden e salarionan subsidia di e entidadnan priva subsidia, manera e cantidad considerable di fundacion riba tereno social.

Por cierto e propuesta di ley di Reino pa supervision financiero ta menciona exactamente e gruponan aki cu ta cay bao di gasto di personal. Articulo 15, inciso 2 di e RAft ta bisa textualmente: “ Den evaluacion referi den inciso 1, e colegio ta maneha e siguiente reglanan pa presupuesto como norma: a. e suma di ie total na gasto di personal di Aruba ta desde 31 di december 2027 maximo 10% di e producto interno bruto. Bao di e total di gasto di personal ta comprende e gastonan di personal di e persona di derecho publico Land Aruba, entre nan loke ta referi na Staten, e Alto Consehonan (RvA y Rekenkamer; red.), Dienst Openbare Werken y fondonan di presupuesto, contratacion di personal externo, sea directo o via ‘opdrachtverlening’, tambe gasto di personal di e organisacionan di ehecucion di seguro social, e subsidionan di salario pa enseñanza no publicoy gasto di personal pa personal saliente, entre nan gasto relaciona cu wachtgeld, vervroegde uittreding y pago di pension cu ta cay a cargo di ‘exploitatierekening’.” Cu esaki gobierno a logra haya aparentemente un ganga ainda, pasobra e propuesta di ley no ta inclui e gastonan di personal di e entidadnan subsidia, loke na 2018 tabata un peso di Afl. 72 miyon, segun e publicacion di fin di 2018 di ministerio di finanzas. Di otro banda, e propuesta di ley ta encera tambe tur locual ta personal externo cu no ta contrata via payroll, sino via cuenta di bienes & servicio, ademas di e fondonan di presupuesto di DOW pa contrata externamente. Cu esaki, e supervisor, gobierno di Reino y su colegio di conseho CAft, ta haya mas ‘grip’ via e grupo mas amplio aki di gasto di personal, cu na e altura aki ta core rond di por lo menos Afl. 700 miyon… Esaki lo haci mas dificil tambe por ehemplo pa baha gasto di personal directamente na e ministerionan, mientras ta aumenta gasto di hende bao contrato cu no ta cay bao di payroll. Si nos no ta quiboca ta gobierno mes lo a propone e criterio aki, pero por ta cu awor nan lo ta corda riba e expresion “be careful what you wish for”.

Riba tur esaki ta bin e norma den e propuesta di ley cu pa 2040 Aruba mester yega na un debe publico cu no ta mas cu 50% di GDP. Den e ley no ta menciona e momento cu ta yega na 70% di GDP, algo cu nos por mira realizable den un periodo razonable, mirando e desaroyo economico actual. Por lo tanto e anticipcion di yega na 70% di GDP na 2028 ta realistico, pero no ta menciona den e ley, ta solamente e 50% na 2040 ta aparece… Kico ta e problema di esaki? Cu e perspectiva a largo plazo sin por spera un desaroyo economico robusto, e dolor lo ta pa bay hustamente di 70% pa 50%… Esaki ta bay exigi un disciplina estricto, hasta severo, durante por lo menos cuatro periodo di gobernacion… Esey ta mustra cu Hulanda no ta mira e supervision financiero como algo pa termino medio so, sino cu e ley lo sirbi pa cana henter e caminda ey, te 2040. Asina grandi aparentemente e confianza ta den capacidad di gobierno local pa cana henter e caminda aki su so.

Ademas, banda di e control estrictamente financiero, ta bin acerca e compromisonan for di e ‘Onderlinge Regeling’, cu ta bay atende e otro aspectonan di reforma di aparato gubernamental. Esaki ta necesario pasobra e normanan financiero no ta cubri e aspectonan di bon servicio, eficiencia, y efectividad den cubri e funcionnan clave di e aparato publico. Y bon mira, mester admiti cu logra control financiero por resulta e parti ‘facil’ di e operacion grandi aki. Mientras Hulanda no a logra impone e proyecto di COHO, e Areglo Mutuo no ta mucho mas ‘suave’ pa loke mester logra den reforma, sigur no si Hulanda logra un gara mas fuerte riba e recursonan financiero. Nos tin e impresion cu gobierno ta bon na altura pero pa algun motibo no ta comenta esaki. No cu e ta haci diferencia den nos opinion cu e supervision ta necesario y urgente.