Gobierno a haya un carta for di comerciantenan den Caya Grandi. Nan a vocifera nan preocupacionnan. Minister di Asuntonan Economico Richard Arends a reacciona riba e carta aki.
Reacion di Minister Arends:
“Como Minister di Asuntonan Economico e preocupacion di comerciantenan di caya grandi tin nos atencion. No solamente pa e comerciantenan di caya grandi, pero di henter Aruba. For di dia cu mi a tuma responsabilidad como Minister di Asuntonan Economico mi ta hibando dialogonan hopi constructivo cu Camara di Comercio, ATIA y Asociacion di Bankeronan riba e modelo di haci negoshi na Aruba en general, pero tambe pa wak kico ta e necesidadnan cu tin y kico gobierno por facilita riba termino cortico.” Arends ta di opinion cu caya grandi ta un ehempel cu gobierno di su banda ta haci hopi pa promove actividadnan pa comercio.
“Actualmente nos ta finalisando e legislacion pa formalisa e zona special di San Nicolas. Na 2013 nos a anuncia un regimen fiscal hopi atractivo pa establecimento di companianan na San Nicolas. E idea semper tabata pa una bes e modelo ey keda cla cu por aplic’e tambe na Oranjestad.” Arends a splica cu Oranjestad tin un accento hopi mas grandi riba comercio, pero Aruba tin un economia hopi habri cu hopi oportunidadnan. Remarcabel ta cu ora e hendenan bay den caya, nan ta yega te na cierto punto y bira bek. Gobierno ta studiando pa mira con trece cambio den e situacion aki. “Caya grandi antes tabata completamente diferente cu awor. Mi famianan p.e. tabata biba den e parti ariba di e tienda y abou tabatin nan negoshi. Esey tabata duna caya grandi un bida constante. ”
Minister Arends a recorda tambe cu un di su antecesornan Minister Hooyboer-Winklaar a flexibilisa e orario di habri tiendanan y awor ta un of dos tienda so ta haci uzo di e orario aki. “Loke mi a trece dilanti cu representantenan di comercio ta cu por ta nos mester reinventa nos forma di haci negoshi na Aruba. Esey mester sosode den un dialogo constructivo entre sector comercial y gobierno.”
Arends tabata hopi cla riba un ponencia cu el a trece dilanti. “Tin un split entre esun cu ta opera e tienda y e doño di e edificio. Asina ta cu cualkier incentivo fiscal cu gobierno por duna simplemente bisa ta bay pa doño di e edificio. Nos kier yega na un combinacion unda doño di e edificio por haya incentivo pa remodela, pero tambe esun cu ta core cu e gastonan diario por haci uzo di e beneficionan. E ta un formula un tiki diferente cu San Nicolas, pero nos ta evaluando con haya e balansa y haci experiencia den caya grandi un poco mas miho.”
