Gobierno t’ey pa…Haci e cosnan ‘normal’…

Goberna un pais ta exigi varios cos. No solamente e representacion di e pais den tur cos cu ta duna oportunidad pa saca potret bunita cu ta ilustra con bon e gobierno di turno ta ‘bezig’, sino mas bien percura cu e cosnan ‘normal’ tuma lugar. Es decir e trabao cu hasta lo por considera ‘laf’ sin nada di ‘glamour’ cu mas probable lo no resulta den extra voto na final di e periodo di gobernacion. Pero, hasta den e caso cu en general lo no tin tanto aprecio pa e trabao aki, den caso cu no ta hacie bon e por ta un fuente interminable di iritacion pa e ciudadano comun y coriente.

Cada vez cu awa yobe nos por ta testigo con nos infrastructura vial ta pidi pordon, y igualmente e ciudadanonan cu ta daña nan shocks di auto den e infinidad di buraco cu tin den asfalt na tur parti di e isla. Y na hopi di e lugarnan aki e asfalt no a kibra awor cu awa a yobe, sino cu e tin den cierto caso algun aña caba asina. Awor cu awa a cay, ta core cera e buraconan mas grandi, pero un reparacion structural y solido no ta tuma lugar. Probablemente lo conta nos cu ‘no tin presupuesto pa esaki’. Y esey por ta berdad, pero no ta hustifica cu esey mester keda asina. Pregunta ta anto: ki dia ta bin un ministro encarga cu infrastructura, cu ta menos interesa den regla tereno valioso pa amigo, y ta cuminza percura cu gobierno ta duna prioridad na e cosnan ‘normal’ cu mester tuma lugar.

Y esey no ta solamente percura pa caretera debidamente manteni, sino tur e otro aspectonan di nos infrastructura. Manera e famoso facilidadnan di purificacion di awa sushi na Bubali y San Nicolas, unda segun nos lo cay atrobe un silencio profundo, te cu bira di berdad demasiado laat pa haci algo, y mester inverti hopi mas pa repara e daño, ademas cu mester inverti den mas capacidad, tumando na cuenta cu nos ta haya miles di camber di hotel acerca, mas miles di trahador di exterior cu mester bin pa traha den e capacidad hotelero extra aki. Nos no ta tende nada di ningun autoridad cu ta duna sikiera un señal cu nan ta trahando riba e planificacion cu esey ta requeri. Di e ministronan nos no por spera mucho, ademas cu e ministerio di infrastructura y planificacion ta firmemente den man di nos Promer Ministro, cu por lo pronto tin otro cos di haci cu atende ‘lopende zaken’ di e ministerio aki. Aunke esey lo no ta corecto pasobra ningun hende a oblig’e di tuma riba su mes e responsabilidad di e ministerio aki, pues pa tur e asuntonan treci dilanti aki nos mester wak den direccion di e ministro cu tin mas departamento pa atende cu un coleccionista di stampia.

Pero si nos analiza bon, no ta trata solamente di algun critica riba aspectonan desatendi na e momento aki. Ora ta papia planificacion, esey ta requeri cu pa definicion nos ta pone nos vista riba kico ta spera nos den futuro. Por ehemplo: Si dado momento como un cuarto parti di e pais aki ta hende di edad, di cual un parti sustancial no por move riba nan mes, pero mester di ayudo den forma di por ehemplo un rolstoel. Bo a yega di purba sali di bo cas cu un ser queri pa dal un vuelta den bario pa distrai? E ora lo bo ripara cu esey ta un biaha cu no lo haya repiticion, y esey pa varios motibo. Pa cuminza tur e cachonan riba caya di e bisiñanan (unda control riba ley di cacho a keda?) lo haci bo keiromento asina desagradable cu bo no kier hacie mas. Y na segundo lugar e situacion den mayoria di bario ta asina cu practicamente no tin acera drechi unda bo por maneha un rolstoel sin pone bienestar fisico y mental di bo ser queri na peligro. Basicamente e unico barionan cu tin acera ta esunnan planifica y desaroya den ultimo añanan di epoca colonial, tempo cu un grupo di ingeniero Hulandes tabata dicidi kico ta traha y con. No ta pornada cu barionan manera Dakota y e bario similar na San Nicolas – e cayanan cu nomber di flor – ta e uniconan cu a haya un structura ordena y riolering; algo desconoci den e productonan di nos hendenan cu ta vocifera na tur momento cu ‘nos mes por’…

Nos ta para dilanti un epoca nobo di preocupacion intenso di Madre Patria cu nos desaroyo socio-economico. Hopi di nos ta sigui ciegamente e gritonan di desesperacion di politico cu ta zundra tocante delaster un aspecto cu ta wardando decadas caba riba mehoracion. Y ainda nan ta keda grita cu nos no mester di otro bin organisa e cos aki pa nos. Pero, pa bisa berdad, sigur den e ultimo 35 aña nos a proba cu nos ta gasta placa riba e cosnan robez y no ta reserva nada pa e cosnan structural cu ta exigi inversion constante den mantenimento. Nos filosofia ta keda di e automobilista cu ta laga tow su auto hiba mecanico pasobra e no ta core mas. Mantenimento na tempo? Never heard of! Presupuesto 2022 mester cuminza mustra placa reserva pa e cosnan ‘normal’ aki.