Despues di reaccionnan di disgusto riba e plataforma social Facebook, Bon Dia Aruba a sali haci un recorido riba nos careteranan pa cual un ciudadano a comenta den un tono chistoso: “Gobierno ta warda pa petrolio sali for di e vloer”. E reaccion aki a bin a base di e tantisimo buraconan cu tin den nos infrastructura.
Den e ultimo temponan Aruba a hay’e confronta cu basta awasero y esaki a pone e calidad di trabou cu ta wordo haci pa nos careteranan riba un ‘test’. E no ta un secreto cu unda cu tin un buraco ta djis ‘patch’, pero hasta esaki tin biaha ta tuma basta siman pa wordo haci manera cu e ta e caso den e.o. Klipstraat. Un di e tantisimo buraconan cu tin den e caya aki a mas cu duplifica den tamaño den e ultimo dos pa tres siman. “Mi tin cu tuma e ruta aki tur dia pa bay trabou y cada dia e buraconan ta birando pio, for di cuminsamento te final di e caminda”, un dama cu ta traha den cercania ta bisa.
Bon Dia Aruba ta conciente cu tin un ‘beleid’ pa loke ta regarda reparacion di careteranan, pero tumando na cuenta tur e buraconan cu tin rond den entre otro Klipstraat, Barcadera, Tanki Flip, Westraat, Dakota y hopi mas, e pregunta ta keda si e maneho aki ta wordo implementa manera mester ta. Bon Dia Aruba lo busca un reaccion di DOW y Gobierno riba e situacion aki cu ta causando un molester pa hopi ciudadano riba nos isla.
