E conseho di Consultorio Consultativo (Raad van Advies) riba e presupuesto 2017 tabata uno negativo. Prome minister Mike Eman a reacciona den otro prensa cu gobierno a tuma nota di esaki y a haci adaptacionnan pa asina e ley a resulta adecua pa entrega na parlamento. Sinembargo gobierno a contraresta e conseho cu consehonan mas positivo di Caft.
Un di e criticonan principal di e Consultorio ta cu no tin suficiente informacion pa por analisa e presupuesto, entre otro pa wak si e ta realistico. Den su contesta (formal esaki ta yama Nader Rapport cu tambe ta bay parlamento hunto cu e presupuesto y e conseho di Raad van Advies) oficial, gobierno ta admiti cu ainda nan sistema financiero no ta funciona manera mester ta pa haya e cifranan actual. Y tambe cu instancianan manera ATA (cu no a duna cifra y tampoco kier a coopera pa duna nan segun e Consultorio) a indica cu nan no por cumpli ainda cu e palabracionnan haci y mester organisa esaki ainda.
Gobierno ta bisa cu ainda lo duna cierto cifranan. Momento cu lo trata e presupuesto den parlamento lo duna nan pa asina nan ta mas actual. E otro contesta cu gobierno ta uza mas tanto ta comentarionan positivo di Caft cu ta indica cu gobierno ta mehorando su relatonan financiero. Pues en bes di reacciona riba e conseho sea tuma e conseho over di Raad van Advies, gobierno ta duna un contesta a base di e conseho di Caft.
Por ehempel e punto 2.7 tocante finansa duradero e organo consultativo ta conseha gobierno (den cuadro tambe di palabracionnan haci cu Caft) pa realisa e meta aki por medio di baha gasto. Specialmente e gastonan social (AZV) y tambe e gastonan di e aparato publico. Esaki ta mas efectivo y lo causa menos daño pa nos economia, segun Raad van Advies.
E contesta di gobierno ta: “contrario cu e Consultorio, Caft ta constata cu e ultimo añanan (gobierno) a tuma diferente paso den e bon direccion pa yega un finansa duradero riba termino largo.”
Gastonan personal
Un punto cu tur aña ta haya hopi atencion ta e gastonan personal. E biaha aki Raad van Advies a critica cu atrobe gobierno lo no cumpli cu bahamento di e gastonan aki, den cuadro tambe di e palabracionnan pa yega un finansa duradero. E palabracionnan ta encera cu gobierno mester corta 5% anualmente riba e gastonan personal. Segun e Consultorio a base di e presupuesto gobierno lo no cumpli ni pa 2017 y ni pe aña actual 2016. En bes cu e gastonan ta baha cu 5%, e lo subi e aña ki cu 0.7%.
Sinembargo gobierno ta bisa cu nan ta riba e caminda pa baha e gastonan personal. “E impresion cu e Consultorio ta duna cu no ta sigur cu lo logra, no ta wordo subraya. Tin un maneho general pero den practica e ta keda algo di midi interes pa motibo cu cada caso tin su circunstancia special.”
Gobierno ta duna e ultimo cifranan (tabla riba e pagina aki) riba e cantidad di funcion full time (FTE) unda por mira cu desde december 2015 e cantidad di personal a baha cu 10 hende total. Na cierto ministerio manera esun di prome minister, Turismo y Economia por mira hasta un crecemento leve.
