Gobierno ta trahando riba ‘werkloosheidsuitkering’; SIWA su caso no tin influencia riba presupuesto y yudansa humanitario

Cierto cambio ta na caminda cu lo toca e ayudo cu gobierno ta otorgando di FASE y subsidio di salario. Minister di Finanzas y Asunto Economico, Xiomara Maduro a informa cu gobierno ta trahando riba un ‘werkloosheidsuitkering’ pa esnan cu a perde trabao. Tambe el a bisa cu den Presupuesto 2021 ta inclui e gastonan di sosten na economia.

Ta asina cu mescos cu 2020 den aña 2021 lo conta tambe cu yudansa di FASE pa esnan cu a perde trabao cu un suma di 44 miyon florin. Igualmente pa loke ta trata e ayudo pa negoshinan chikito y mediano a wordo presupuesta 40 miyon disponibel. Encuanto pa subsidio di salario tin 280 miyon florin cu a wordo presupuesta.

Tur e cifranan aki ta cifranan preliminar. Sinembargo minister Xiomara Maduro a trece cierto trankilidad bisando cu e ayudo lo continua pa esunnan cu ta perde trabao. Pero apesar cu den e concepto di e ley di presupuesto 2021, e fondo of asistencia tanto di subsidio di salario y di FASE ta wordo menciona. Pero ainda no tin un suma aloca.

Encuanto si e suma aki no a wordo aloca wardando riba e veredicto di e caso cu sindicato SIWA a entabla contra e compania estatal WEB pa stop riba cortamento di beneficio salarial di e trahadonan destina pa e fondo di solidaridad. Minister Maduro a contesta Bon Dia Aruba cu e suma aki cu ainda no a wordo aloca, no ta depende di e sentencia di hues di dia 10 di maart venidero. “E ta full apart di locual ta e caso di SIWA den esaki,” el a declara. El a agrega cu e caso no tin niun influencia riba e parti di yudansa humanitario.

Decision di Hulanda

El a referi cu Secretario di Estado, Raymond Knops a indica cu Hulanda ta bay asisti te na 1 di juli awor cu e yudansa humanitario via Cruz Cora. Despues di e fecha aki, pais Aruba mes mester tuma e yudansa aki over.

El a splica cu na momento cu e informacion aki a wordo duna dor di e mandatario Hulandes, ya caba presupuesto di pais Aruba tabata den su proceso wardando riba recomendacionnan di CFT.

Pero di otro banda e agenda di e landspakket a wordo publica 1 di februari ultimo. Un di e accion ta cu Aruba tin cu haci plan, con gobierno ta bay provee y organisa e ayudo aki. Un aspecto importante tin di haci, cuanto e ta bay costa pa asina gobierno por hink’e den presupuesto di pais Aruba.

E mandatario a bisa cu ainda no tin informacion concreto, ya apenas gobierno ta trahando riba esaki. E mandatario a indica cu a wordo presupuesta 362 miyon di gasto pa sostene economia. E suma aki ta wordo tuma pa por brinda e sosten necesario pa atende cu e ayudonan aki. Esaki ta parti di e cifra cu recientemente minister Maduro a presenta di forma preliminar.

Pero unabes cu gobierno ta haya e conseho di Raad van Advies (RvA), nan lo presenta e cifranan cu lo wordo entrega na Parlamento pa su debido debate. Igualmente e recomendacionnan di e organo di supervision financiero CFT y tambe e cambionan cu finalmente gobierno mester a haci riba presupuesto 2021.

Werkloosheidsuitkering

Segun e mandatario e ‘werkloosheidsuitkering’ lo bay bira un tipo di FASE, te hasta cu un suma mas halto cu esun di FASE. Pues e FASE den su concepto actual ta bay stop di existi. E lo wordo substitui pa e asina yama ‘werkloosheidsuitkering’.

Pero di otro banda, e ta otro sistema pa aplica pa e ayudo di e fondo aki. E ta mara na un obligacion di esun cu ta aplica pa busca trabao. Of e persona mester haci trabao na beneficio di comunidad pa asina e por haya un entrada pa sostene su mes y su famia.

Te ainda no tin informacion concreto, pero pronto gobierno lo informa riba tur e reglanan pa aplica na e ayudo aki. Tambe nan lo informa riba e instancia cu ta keda asigna pa por haci e trabao aki.

E sistema aki ta algo cu gobierno ta trahando riba dje, y cu tambe nan a yega di papia cu Hulanda pa bay den negociacion tocante e tipo di ayudo aki. Igualmente e hende cu ta perde trabao mester tene na cuenta cu e subsidio di salario ta bira menos. Pues e suma cu ta poni pa subsidio di salario ta pasa pa e suma cu bo a duna pa e uitkering, segun e mandatario.

Tambe el a referi riba e sosten cu gobierno lo brinda durante 2021 pa por mantene e sistema di siguridad social di SVB y AZV cu ta bao cierto presion debi na e pandemia. Pero banda di dje e gastonan pa por sostene economia di pais Aruba. E gasto poni riba presupuesto 2021 pa sosten social ta 96 miyon florin. Entre nan 12 miyon pa SVB y 84 miyon pa AZV.