Ayera na Renaissance Convention Center a tuma luga e EduCanada fair. Tanto studiantenan como mayornan a haya informacion di e opcionnan pa studia na Canada durante e dia. Segun James van der Linde, e evento aki ta parti di un proyecto di e ministerio pa diversifica opcionnan di estudio brinda na studiantenan.
E evento a core di 9 or di mainta te 7 or di anochi, cu varios charla duna di 2 or pa 7 or pa scolnan local, scolnan na Canada y ministerio di Enseñansa. Nos a haya algun comentario di mayornan cu a haya cu e evento ta un bon iniciativa, pero e tabata dificil pa atende e charlanan pasobra nan mester ta na trabou. “Lo tabata miho pa en caso cu hende no yega e presentacionnan, nan lo por a duna informacion di e contenido di esaki toch”, tabata un comentario.
E studiantenan mes tabata hopi interesa den haya informacion na e varios balienan directamente di personanan di Aruba cu a yega di bay e scolnan. Entre otro, por a mira presencia di Niagara College, Seneca College of Applied Arts and Technology, Bishop’s University, Centennial College, Humber College y Charleton University. Scolnan local tambe tabata presente, incluyendo Colegio EPI, Universidad di Aruba, IPA, Academy of Fine Arts & Design Aruba y International School.
Tabatin studiantenan cu a expresa cu: “E ta hopi bon pa educacion na Aruba pasobra nos ta haya mas opcion cu djis studia na Hulanda of na Merca.” Tambe e aspecto cultural ta hunga un rol, segun algun studiante. ‘Mi ta sinti cu nan ta mas amabel cu na Hulanda, y tambe tin hende cu ta haya culture shock pisa ora nan bay Hulanda.” Loke un studiante a conclui ta: “Mas opcion semper ta miho. Tin hende cu lo ta mihor na Hulanda y tin hende cu lo ta miho na Canada, etc.”
Hopi interes pa mas estudio na Ingles
Sr. Van der Linde di ministerio di Enseñansa, ta splica cu esaki tabata un proyecto cu ta parti di e proceso pa cera acuerdonan cu institucionnan na Canada y Merca. “P’esey nos a organisa pa hunto cu Embahada di Canada na Caracas haci e evento aki posibel.”
E ministerio a haya hopi interes pa mas opcion den estudionan na Ingles, cual ta un motibo pa organisa e evento ayera. “Esaki no tabata un proceso facil, nos mester a mustra cu aunke Aruba ta chikito, nos tin hopi potencial. Despues di tin 2 aña caba ta deliberando cu institucionnan di enseñansa, nan a cuminsa realisa cu esaki ta un mercado cu nan no por neglisha.”
Sr. van der Linde ta splica cu nan a cera acuerdonan cu varios colleges na Canada unda cu ta ofrece e studiante Arubano cierto descuentonan of becanan. “Tur esaki ta den cuadro di nos maneho pa diversifica enseñansa, nos kier crea mas opcion y mas rutanan pa e studiante por yega na su meta.”
Reconocimento di diploma
Locual studiantenan di Aruba si mester tene cuenta cu ne ta e titulonan. Si nan ta wordo reconoci na nivel internacional y tambe si studiantenan por sigui traha na Canada of tambe bin bek Aruba. Esaki segun sr. van der Linde ta posibel cu e institucionnan cu nan a cera acuerdo cu ne. “Tanto e gobierno Canades como nos gobierno ta reconoce e titulonan di e institucionnan aki.”
E ta sigui splica cu ‘hustamente awe nos a tene un reunion cu representantenan di e sector di industria y comercio pa wak kico ta e implicacion ora cu studiantenan bin bek di un estudio na Canada’. Esaki en conexion cu mercado laboral na Aruba. Sr. van der Linde ta conseha studiantenan pa studia na un institucion cu ta acredita, ya cu si e tin esaki e studiante por bin bek sin problema.
Sinembargo sr. van der Linde ta splica cu tin tres sector cu ta haci esaki dificil, teniendo cuenta cu leynan laboral actual. ‘Den e caso aki por papia di e sector di enseñansa, cu na cierto nivelnan docentenan cu diploma di Reino so por duna les’. Esaki tambe ta conta pa e sector di salubridad, en particular e parti medico. Y tambe si studia ley esaki por bira complica mirando cu nos leynan ta Hulandes. Pero segune, den e sector di ley ‘mas y mas hende ta studiando por ehempel international tax law y international human rights law, cual ta conoci y por wordo eherce ki nan’.
Den sector medico, sr. van der Linde ta anuncia cu tin proceso andando pa por reconoce titulonan di personanan cu a studia den region. “Esaki ta mas cu logico, pasobra si e profesional ta cumpli cu tur standard internacional no mester tin ningun problema cu esaki.”
Pa sector di enseñansa, sr. van der Linde ta splica cu tambe tin un proceso andando pa diversifica e enseñansa. “Nos kier trece mas persona cu por ehempel por duna les na Ingles pa e ora ey e idioma di instruccion no ta exclusivamente den Hulandes. Asina ki lo tin mester di profesionalnan cu ta domina otro idioma pa duna les.”
