Maske e coalicion di MEP-POR-RED ta pone accento grandi riba transparencia den acuerdo di gobernacion, realidad ta laga hopi di desea. Ministernan sea ta ignora ciudadano of periodista cu entrega Lob-verzoek of no ta duna loke nan ta pidi. Incluso sigui cambionan den ley y mira ki mocionnan of preguntanan por escrito parlamentarionan ta entrega, ta dificil.

Manera Bon Dia a publica anteriormente, minister di husticia Andin Bikker (POR) a ignora e periodista cu a entrega un Lob-verzoek pa haya sa entre otro cuanto ta gasta riba detencion di personanan sin status regular. E minister a ignora e peticion te cu no por a sigui ignora mas, pa via cu a exigi un dwangsom.

Despues di esaki, a busca mas experiencia cu ciudadanonan lo por a tin cu un peticion di Lob (Landsverordening Openbaarheid van Bestuur). Ursell Arends di partido Raiz di su banda a comenta cu no tur minister ta tuma Lob-verzoek na serio. Den Raiz su experiencia, e unico ministernan cu a contesta nan denter di e termino di 3 siman cu e Lob ta stipula, tabata prome minister Evelyn Wever-Croes y ex-minister di infrastructura actualmente bou investigacion Otmar Oduber.

‘No ta duna ningun documento’

Un ambtenaar cu ta prefera di permanece anonimo, di su banda a nota den su experiencia tempo e tabata trata peticionnan di Lob na su departamento cu: “Nan ta bay na e bureau di e minister concerni. Anan ta wak kico nan kier permiti un ciudadano haya bista den dje (inzage) y kico no. Pero nunca nan ta(bata) duna documento”

E ambtenaar a nota cu pa hopi aña e nunca a mira un peticion di Lob drenta. Pero e prome biaha cu el a mira un, el a pensa ‘esaki mester wordo contesta’. Ora el a bay combersa cu su hefe, e hefe a explicitamente menciona cu nan no ta duna ningun documento. “El a bisa mi pa manda un carta y bisa cu nan mag di solamente bin wak (inzage) loke ta den e file. Djey nan ta hinca solamente loke nan kier pa e ciudadano wak.”

E Lob conoce varios forma pa duna acceso na informacion bou un departamento di gobierno of un minister. Asina por duna un copia di e informacion pidi den forma fisico of por ehempel digital, un resumen por escrito di e informacion cu ta wordo pidi, ta permiti pa un ciudadano tira bista riba e documento, of duna un splicacion verbal di e contenido di un documento. Esakinan estableci den articulo 4, inciso 1 di e Lob.

Pero a base di kico un minister por nenga di otorga acceso na documentonan den un di e formanan aki? E Lob conoce un cantidad amplio di excepcion pa duna documentonan, estableci den articulonan 8 y 9 di e Lob. Entre nan, por rechasa di duna un documento den cuadro di un investigacion penal, interesnan economico of financiero di e pais, ora ta trata informacion di compania of fabrica, of deliberacion interno.

‘Excuus frecuente: informacion pa deliberacion interno’

E ultimo aki, ta e excuus cu e ambtenaar a nota cu ta uza hopi biaha. Ta trata di documentonan interno pa deliberacion interno solamente. “Esey un tercer partido no mag di wak.” Ademas, den su experiencia e ta nota cu ta bin instruccionnan di ariba, pa simplemente pone e persona pasa personalmente (un di e maneranan cu por honra e peticion di Lob), “cual nan sa hopi hende no lo bay haci. Nan no mag ni saca potret.”

Esaki ta algo cu e periodista a yega di experiencia tambe. El a entrega un peticion di Lob cerca ex-minister Otmar Oduber, explicitamente pidiendo pa un copia di e acta di otorgamento di tereno pa construi e hotel Secrets na Seroe Colorado. E ex-minister e tempo ey a dicidi pa en bes invita e periodista pa bay tira bista den e documento na DIP. Esaki mientras articulo 4, inciso 2 di e Lob ta indica cu ta tene mas cu ta posibel consideracion cu e manera den cual e ciudadano a pidi pa haya e documentonan.

E excuus di no duna informacion pasobra un documento lo ta interno mientrastanto no ta cuadra cu articulo 9, prome inciso di e Lob. E articulo aki ta stipula cu documentonan traha den cuadro di deliberacion riba un cuestion di maneho, no ta wordo publica solamente den casonan cu e informacion ainda ta wordo procesa, of ora ta trata opinionnan di personanan envolvi den e establecimento di maneho. Ora ta un opinion, e partinan di e documento cu ta echonan si mester wordo publica, si a base di articulo 8 no tin otro rason pa no duna e documento.

Pues den e caso ey mester por kita (redacta) e partinan cu Lob ta permiti pa no wordo publica, pero si laga e resto di e documento cu no ta cay bou un categoria di excepcion intacto pa otorgamento.

‘Di ariba ta haci bida pa ciudadano cu kier transparencia imposibel’

Pero kico ta pasa ora cu bo haya un contesta? E ambtenaar a conta cu den su experiencia, cual ta coincidi cu e experiencia di e periodista, ta duna contestanan negativo simple. Sigur si un persona a entrega un obhecion. E caminda pa yega hues ta habri e ora ey, pa un persona por sigui bringa su caso. “Pero hopi biaha hende ta cansa. Nan ta haci e bida pa ciudadano imposibel ora nan kier transparencia. Solamente loke nan kier pa e ciudadano wak, ta accesibel.”

Parlamento.aw tin documentonan te 2016 so

Banda di e poder ehecutivo (gobierno) riba cual e Lob ta aplicabel, tin e poder legislativo, esta parlamento, cual no ta cay bou di e Lob. Sinembargo parlamento tambe ta laga hopi di desea, maske den acuerdo di gobernacion MEP-POR-RED a establece cu lo laga ciudadanonan sigui e proceso legislativo di cerca y participa directamente cune.

Actualmente Parlamento di Aruba tin un website, cual bou di e seccion “Statenstukken”, no ta duna ningun informacion riba proyecto di ley, preguntanan por escrito di parlamentarionan, mocionnan, notanan di cambio ni amiendanan cu ta actualisa. E unico documentonan cu tin disponibel riba e website aki ta di 2012-2016, cu hopi buraco entre kico si tin y kico no tin. E periodista a purba haya un splicacion di Parlamento pakico esaki t’asina, pero despues di varios e-mail, no a ricibi ningun contesta. Ya tin por lo menos 1 aña purbando haya contesta riba esaki via e-mail.

E informacion aki hopi biaha ta existi, ta publico y disponibel, pero solamente por haya acceso via un persona cu por duna e informacion. Asina por ehempel ta posibel pa pidi e splicacion di un ley, e Memorie van Toelichting, cerca Departamento di Legislacion y Asunto Huridico (DWJZ), pero esaki pa un prijs. E periodista por ehempel periodicamente ta pidi documentonan cerca parlamentarionan, cual den mayoria caso ta duna nan.

‘Corte uzando leynan anticua’

Carlos Bollen, profesor hefe di derecho priva na Universidad di Aruba a bisa cu por ehempel cu e cambionan den e Codigo Civil cu ta pendiente, no solamente a introduci cambionan den Codigo Civil si no tambe den un cantidad di otro leynan. “Den e caso aki un version consolida di e ley cu tur e cambionan inclui lo bin eventualmente riba site di gobierno unda ta pone e Afkondigingsbladen, mirando cu esey si ta mas y mas accesibel. Pero e otro leynan up to date, lo ta dificil pa haya riba internet.”

Loke e docente mes a yega di mira, ta cu por ehempel na corte ta traha cu textonan di leynan cu ya a bira bieu, pasobra entretanto nan a wordo cambia. “Simplemente pasobra bo ta perde bista riba tur e cambionan cu a pasa. E lo ta importante pa haci esaki mas accesibel.”

‘Informacion liber ta esencial pa democracia funciona’

Profesor di derecho constitucional Ryçond Santos Do Nascimento di su banda tambe ta haya cu tur cambio den ley y tambe cambionan pendiente mester por wordo sigui riba un luga central. Na Hulanda por ehempel, tin e portal di gobierno wetten.overheid.nl, riba cual no solamente por mira kico ta e version di un ley vigente, pero tambe cual tabata vigente den pasado.

Cu e informacion ta disponibel ta sumamente importante pa democracia, segun Santos Do Nascimento. “Bo tin un parti di gobernacion cu no tin bista riba dje. E ora ey bo no por controla y bo no por critica kico ta pasando. E cultura di informacion na Aruba ta hopi atrasa. Autoridad ta exigi pa bo obedece, pero nan mester por argumenta dicon y a base di echonan. Den democracia, bo ta obedece autoridad pasobra nan tin rason y no simplemente pasobra nan tin autoridad.”

Registro di preguntanan di parlamento na ministernan sin contesta

E profesor di derecho constitucional ta menciona ademas cu cada parlamentario tin derecho pa haci pregunta na ministernan, y e ministernan tin un obligacion pa contesta. Pero den practica, esaki por varia. Den cuadro di transparencia, bon gobernacion y democracia, tin ainda trabou pa wordo haci, segun e profesor. “Lo ta interesante pa tin un registro di preguntanan cu parlamentarionan ta haci na ministernan cu ta keda sin contesta.”